Gürcüstanda tibb bacısı koronavirusa qarşı vaksindən ölüb
Tbilisi, 19 mart, AZƏRTAC
Gürcüstanda koronavirusa qarşı peyvənd olunmuş tibb bacısı Meqi Bakradze müalicə aldığı birinci Universitet Klinikasında dünyasını dəyişib.
AZƏRTAC xəbər verir ki, bu barədə klinikadan məlumat verilib.
Bildirilir ki, 27 yaşlı tibb bacısı Meqi Bakradze martın 17-də Axaltsixedə koronavirusa qarşı peyvənd olunub. Peyvənddən 30 dəqiqə sonra onda anafilaktik şok baş verib və xəstə martın 18-də Tbilisiyə gətirilərək klinikaya yerləşdirilib.
Həkimlərin səylərinə baxmayaraq gənc tibb bacısının həyatını xilas etmək mümkün olmayıb.
Qeyd edək ki, Gürcüstanda martın 15-dən tibbi personalın peyvəndinə başlanılıb. Bu günədək 3 minə yaxın tibb işçisinə, o cümlədən ölkə Prezidenti Salome Zurabişviliyə “AstraZeneca” peyvəndi vurulub.
Tibb bacısının ölümü ölkədə vaksinasiyadan ilk ölüm faktıdır.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
