Gürcüstanın və Qazaxıstanın hökumət başçıları Transxəzər nəqliyyat marşrutunun inkişaf perspektivlərini müzakirə ediblər
Tbilisi, 1 avqust, AZƏRTAC
Qazaxıstan ilə Gürcüstan tranzit və nəqliyyat sahəsində əməkdaşlığa böyük əhəmiyyət verirlər. İki ölkə arasında Transxəzər beynəlxalq nəqliyyat marşrutunun inkişafı sahəsində tərəfdaşlıq sürətlə möhkəmlənir. Cari ilin birinci yarısında Orta Dəhliz üzrə yükdaşımaların həcmi 77 faiz artaraq 1,3 milyon tona çatıb.
AZƏRTAC xəbər verir ki, bu fikirlər Almatıda səfərdə olan Gürcüstanın Baş naziri İrakli Qaribaşvilinin qazaxıstanlı həmkarı Alixan Smailovla görüşündə səslənib.
Söhbət zamanı dəhliz üzrə rəqəmsallaşma, sabit daşıma tariflərinin təmin edilməsi və vahid logistik operatorun yaradılması məsələlərinə xüsusi önəm verilib. Tərəflər regionun nəqliyyat əlaqələrinin artırılmasında və tranzit şəraitinin daim yaxşılaşdırılmasında maraqlı olduqlarını vurğulayıblar. Qazaxıstan-Gürcüstan tərəfdaşlığının bütün sahələrdə dinamik inkişafının təmini üçün çoxşaxəli işi davam etdirməyə hazır olduqlarını bəyan ediblər.
Söhbət zamanı bildirilib ki, 6 ayın yekunlarına görə, iki ölkə arasında ikitərəfli ticarət dövriyyəsi 30 faiz artıb.
Qeyd edək ki, Gürcüstanın Baş naziri İrakli Qaribaşvili avqustun 1-də Pekindən Qazaxıstana səfərə gəlib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
