HACIQABULUN BİRİNCİ MEYNİMAN KƏNDİNDƏ XİLASETMƏ TƏDBİRLƏRİ DAVAM ETDİRİLİR
Hacıqabul, 24 may (AZƏRTAC). Xəbər verildiyi kimi, mayın 23-də axşam saatlarında Hacıqabul rayonunun Birinci Meyniman kəndində Kür çayı bəndi yarmışdır. Nəticədə kənddəki 100-ə yaxın evi su basmışdır. Əhali köçürülmüşdür.
Hacıqabul Rayon Fövqəladə Hallar Komissiyasının sədri Sahib Aslanovun məlumatına görə, hadisə qəflətən baş vermişdir. Bu yerdə bəndin yarılacağı gözlənilmirdi. Hazırda əraziyə Fövqəladə Hallar Nazirliyinin, “Meliorasiya və Su Təsərrüfatı” Açıq Səhmdar Cəmiyyətinin, eləcə də rayonun idarə, müəssisə və təşkilatlarının bütün texnikası cəlb olunmuşdur. Bəndin bərkidilməsi istiqamətində tədbirlər həyata keçirilir. Mühafizə bəndi qurulur.
İndi Kür boyu ərazilərdə təhlükəli vəziyyət yaranan yerlərdən biri də Salyan rayonunun Sarvan kəndidir. Baş Mil-Muğan kollektorunun bu hissəsində suyun daşması müşahidə olunur.
Salyan Rayon Fövqəladə Hallar Komissiyasının sədri Etibar Hüseynov demişdir ki, təhlükəli vəziyyət yaranmış yerlərdən biri də, Bakı-Astara magistral yolunun kollektorun üzərindən keçən körpüsüdür. Həmin yerdə su bir neçə metr də qalxarsa körpü su altında qala bilər.
Etibar Hüseynovun sözlərinə görə, ərazidə suyun otlaq sahələrinə axıdılması üçün 4 yerdən bəndlər açılmışdır. Bundan əlavə, Fövqəladə Hallar Nazirliyinin, “Meliorasiya və Su Təsərrüfatı” Açıq Səhmdar Cəmiyyətinin texnikası və canlı qüvvəsinin, habelə yerli sakinlərin köməyi ilə bəndbərkitmə işləri davam etdirilir.
Bölmənin digər xəbərləri
