Hamit Altıntop Azərbaycanda işləmək istəyir - EKSKLÜZİV
Bakı, 31 oktyabr, AZƏRTAC
Türkiyə millisinin sabiq futbolçusu Hamit Altıntop Azərbaycanda işləmək istəyir.
Bu barədə AZƏRTAC-a müsahibəsində 42 yaşlı veteran oyunçu özü məlumat verib.
O, bilik və təcrübəsini bölüşməkdən, xüsusən də gənc oyunçuların inkişafına dəstək olmaqdan həmişə məmnun olduğunu bildirib: “Axı biz hamımız eyni mədəniyyətin və futbol ailəsinin bir hissəsiyik. İstər Türkiyə Futbol Federasiyasında (TFF) işlədiyim vaxtlarda, istərsə də ondan sonrakı dönəmdə Azərbaycandakı futbol rəsmiləri (AFFA) ilə daim əlaqə saxlayırıq. Hazırda heç bir rəsmi əməkdaşlıq gündəmdə deyil. Ancaq Azərbaycan futboluna göstərdiyim hörməti və marağımı hər fürsətdə vurğulayıram”.
Almaniya futbolunun yetirməsi olan Hamit Altıntop bu ölkənin “Şalke” və “Bavariya” kimi tanınmış komandalarında çıxış edib. O, həmçinin İspaniya nəhəngi “Real Madrid” və Türkiyə təmsilçisi “Qalatasaray”ın formalarını geyinib. Türkiyə yığmasının heyətində 82 oyun keçirən keçmiş yarımmüdafiəçi 7 qolla yadda qalıb.
Qeyd edək ki, Hamit Altıntopla müsahibənin tam mətni bir qədər sonra AZƏRTAC-da yayımlanacaq.
Bölmənin digər xəbərləri
