ELM VƏ TƏHSİL
Hədəf STEAM Liseyi onlayn təcrübə proqramı elan edir
![Hədəf STEAM Liseyi onlayn təcrübə proqramı elan edir](/files/2020/1/1200x630/158772448661903255_1200x630.jpg)
Bakı, 24 aprel, AZƏRTAC
Hədəf STEAM Liseyinin STEAM İnnovasiyalar Mərkəzi müəllimlərin STEAM əsaslı təhsil kompetensiyalarının formalaşması və artırılması məqsədilə onlayn təcrübə proqramı elan edir.
Hədəf STEAM Liseyindən AZƏRTAC-a bildirilib ki, təcrübə proqramı “Microsoft Teams” proqramı üzərindən onlayn həyata keçiriləcək.
Proqramda hazırda müəllimlik fəaliyyəti ilə məşğul olanlar, pedaqoji ali təhsil almış məzunlar və tələbələr, eyni zamanda Bakı şəhərində fəaliyyət göstərən institut və universitetlərin magistratura və doktoranturasında təhsil alanlar iştirak edə bilərlər. Proqram iştirakçıları STEAM təhsilini təlimlər əsasında dərindən mənimsəyəcək, bu istiqamətli onlayn dərslərin təşkilində iştirak edəcək, sonda isə qiymətləndirmədən keçərək müvafiq sertifikatlarla təltif olunacaqlar.
Proqram Azərbaycan dilində həyata keçiriləcək.
Onlayn təcrübə proqramı aprelin 26-da başlayacaq və 2 ay müddətində davam edəcək.
Proqrama onlayn qeydiyyat aprelin 25-dək davam edir.