Hərbi ekspert: Ordu quruculuğu dövlət siyasətinin əsas prioritetlərindən birinə çevrilib
Bakı, 26 iyun, AZƏRTAC
1993-cü ildə xalqın tələbi ilə hakimiyyətə qayıdan Ümummilli Lider Heydər Əliyevin rəhbərliyi altında Azərbaycan Ordusu inkişafın yeni mərhələsinə qədəm qoydu və ordu quruculuğunda əsas prioritetlər müəyyənləşdirildi.
Bunu AZƏRTAC-a açıqlamasında hərbi ekspert İbrahim Rüstəmli deyib.
Onun sözlərinə görə, ilk növbədə Azərbaycan Silahlı Qüvvələrinin möhkəm hüquqi bazası formalaşdırıldı. Milli Məclisdə Silahlı Qüvvələrin və hərbi qulluqçuların statusu, hərbi qulluqçuların sosial müdafiəsi haqqında və digər mühüm qanunlar qəbul edildi. Bununla da ordunun fəaliyyətini tənzimləyən qanunvericilik bazası yaradıldı.
“Həmin dövrdə ordunun qarşısında duran əsas məsələlərdən biri kadr potensialının gücləndirilməsi idi. Bu məqsədlə Ümummilli Lider Heydər Əliyev MDB ölkələrinin silahlı qüvvələrində xidmət edən azərbaycanlı zabitlərin Vətənə qayıtmasına çağırış etdi, eyni zamanda, Əfqanıstan müharibəsi veteranları və cəbhədə xidmət edən hərbçilərlə görüşlər keçirdi.
Həmin müraciətlər və görüşlər ordumuzun kadr potensialının formalaşmasında, Silahlı Qüvvələrin ilk mərhələdə ayağa qalxmasında mühüm rol oynadı", - deyə ekspert qeyd edib.
O vurğulayıb ki, Azərbaycanın beynəlxalq hərbi əməkdaşlığının genişləndirilməsi də ordu quruculuğunun mühüm istiqamətlərindən biri olub.
"Azərbaycan qısa müddətdə dünyanın 30-dan çox inkişaf etmiş hərbi dövlətləri ilə ikitərəfli və çoxtərəfli əməkdaşlıq qurdu. Birgə təlimlər, təcrübə mübadiləsi və azərbaycanlı hərbi qulluqçuların beynəlxalq təlimlərə cəlb olunması ordumuzun peşəkarlığının artırılmasına mühüm töhfə verdi. Digər mühüm istiqamət Silahlı Qüvvələrin maddi-texniki bazasının gücləndirilməsi və müasir silahlarla təmin olunması idi.
Azərbaycan inkişaf etmiş ölkələrlə hərbi-texniki əməkdaşlıq quraraq müasir silahların alınmasını hüquqi baxımdan təmin etdi. Türkiyə başda olmaqla bir sıra ölkələrdən müasir silah və hərbi texnika əldə olundu. Bununla yanaşı, həmin silahlardan peşəkar istifadə edə biləcək hərbi kadrların hazırlanmasına xüsusi diqqət yetirildi. Hərbi qulluqçular dünyanın aparıcı hərbi mərkəzlərində təhsil və hazırlıq keçərək yeni silah sistemlərinin tətbiqi üzrə yüksək bilik və bacarıqlara yiyələndilər", – deyə o bildirib.
İbrahim Rüstəmli əlavə edib ki, hərbi qulluqçuların sosial müdafiəsinin gücləndirilməsi də ordu quruculuğunun əsas istiqamətlərindən biri olub: "Ordunun maddi-texniki bazasının möhkəmləndirilməsi, hərbi qulluqçuların maaşlarının mərhələlərlə artırılması, mənzillə təminatı, kirayə haqlarının ödənilməsi kimi tədbirlər hərbi xidmətin nüfuzunu artırdı və şəxsi heyət üçün ciddi stimul yaratdı. Son 20 ildən artıq dövrdə Prezident, Silahlı Qüvvələrin Ali Baş Komandanı İlham Əliyevin rəhbərliyi ilə ordu quruculuğu dövlət siyasətinin əsas prioritetlərindən birinə çevrilib".
Ekspert qeyd edib ki, məhz bu ardıcıl siyasətin nəticəsində Azərbaycan Ordusu 44 günlük Vətən müharibəsində tarixi Zəfər qazandı: "Ordumuz ən müasir silah və texnologiyalardan peşəkar istifadə edərək ildırım sürəti ilə Qarabağı işğaldan azad etdi. Daha sonra lokal xarakterli antiterror tədbirləri nəticəsində ölkəmizin bütün ərazisində dövlət suverenliyi tam bərpa olundu".
İbrahim Rüstəmli bildirib ki, bu gün Azərbaycanın müdafiə sənayesi də uğurla inkişaf edir. Azərbaycan artıq təkcə silah alan deyil, həm də silah istehsal və ixrac edən ölkəyə çevrilib. Müdafiə sənayemizin məhsulları beynəlxalq sərgilərdə nümayiş etdirilir və böyük maraq doğurur. Bununla yanaşı, müasir silah sistemlərini peşəkar şəkildə idarə edə bilən hərbi kadrların hazırlanması da davam etdirilir.
Bölmənin digər xəbərləri
