“Heydər Əliyev zirvəsi” mövzusunda tədbir keçirilib
Bakı, 9 dekabr, AZƏRTAC
Dekabrın 9-da Yeni Azərbaycan Partiyası (YAP) Mərkəzi Aparatının və partiyanın Nərimanov rayon təşkilatının birgə təşkilatçılığı ilə “Konstitusiya və Suverenlik İli” çərçivəsində “Heydər Əliyev zirvəsi” mövzusunda tədbir keçirilib.
Partiyadan AZƏRTAC-a bildirilib ki, əvvəlcə Ulu Öndər Heydər Əliyevin büstü önünə gül dəstələri düzülüb.
Tədbirdə Ulu Öndər Heydər Əliyevin, Azərbaycanın ərazi bütövlüyü və suverenliyi uğrunda canlarını qurban vermiş şəhidlərin əziz xatirəsi bir dəqiqəlik sükutla yad edilib. Sonra Azərbaycan Respublikasının Dövlət Himni səsləndirilib.
YAP Nərimanov rayon təşkilatının sədri Elçin Quliyev çıxış edərək Ulu Öndər Heydər Əliyevin tarixi xidmətlərindən bəhs edib. Bildirib ki, Azərbaycanın inkişaf strategiyasının müəllifi Ümummilli Lider Heydər Əliyevdir. Ulu Öndərin layiqli davamçısı Prezident İlham Əliyevin rəhbərliyi ilə həyata keçirilən müdrik siyasət nəticəsində Azərbaycan qüdrətli və qalib ölkəyə çevrilib. Əldə olunan uğurların zirvəsində işğal altındakı torpaqlarımızın azad edilməsi, ərazi bütövlüyümüz və suverenliyimizin bərpası dayanır.
Tədbirin moderatoru, YAP Mərkəzi Aparatının Gender siyasəti və gənclərlə iş şöbəsinin müdiri Zəkiyyə Musayeva ölkəmizin inkişafında Ulu Öndər Heydər Əliyevin misilsiz rolundan danışıb. Qeyd edib ki, Ümummilli Lider müstəqil Azərbaycan dövlətinin memarı kimi adını tariximizə əbədi həkk etdirib. Bu gün məhz Ulu Öndər Heydər Əliyevin qurucusu olduğu müstəqil Azərbaycan Prezident İlham Əliyevin rəhbərliyi ilə inkişaf edir, yeni zirvələr fəth edir. Uzun illər müxtəlif sahələrdə həyata keçirilən siyasət nəticəsində Azərbaycan Vətən müharibəsində şanlı Qələbə qazandı, ölkəmizin suverenliyi tam bərpa olundu.
Kiçik və Orta Biznesin İnkişafı Agentliyinin (KOBİA) sədri Orxan Məmmədov bildirib ki, Ulu Öndər Heydər Əliyev müasir Azərbaycan dövlətinin qurucusu və dünya siyasətində dahi şəxsiyyət kimi tarixdə silinməz iz qoyub. Ümummilli Lider Azərbaycan iqtisadiyyatının yeni prinsiplər əsasında qurulmasında və sahibkarlığın inkişafında mühüm rol oynayıb. Ulu Öndər Heydər Əliyev sahibkarlığı milli iqtisadi gücün əsas dayağı hesab edib, ölkədə ilk dəfə sahibkarlığın hüquqi bazasını formalaşdırıb. Bu gün Azərbaycanda sahibkarlığın inkişafı üçün yaradılan mühit Prezident İlham Əliyev tərəfindən Ulu Öndər Heydər Əliyevin qoyduğu təməl üzərində uğurla davam etdirilir.
YAP Veteranlar Şurasının üzvü, tarix elmləri doktoru Dilarə Seyidzadə isə mövzu ilə bağlı məruzəçi qismində çıxış edib. O, Ümummilli Lider Heydər Əliyevin xalqımız qarşısında misilsiz xidmətlər göstərdiyini deyib. Vurğulayıb ki, Azərbaycanın müstəqilliyinin qorunması və möhkəmlənməsi Ümummilli Liderin sayəsində mümkün olub. Dahi Heydər Əliyev, həmçinin ölkəmizin inkişafı naminə mühüm işlər görüb. Vətən müharibəsində Azərbaycanın qazandığı Qələbə Heydər Əliyev siyasətinin bəhrəsidir. Bu gün Prezident İlham Əliyev Heydər Əliyev siyasətini uğurla davam etdirir. Azərbaycan bütün sahələrdə inkişaf edir.
Sonra iştirakçıların sualları cavablandırılıb, partiya sıralarına yeni qəbul olunan şəxslərə üzvlük vəsiqələri təqdim olunub.
Bölmənin digər xəbərləri
