ORDU
Heydər Əliyev adına Azərbaycan Ali Hərbi Məktəbinin kursantları Vətənə sədaqət andı içiblər
Bakı, 16 sentyabr (AZƏRTAC). Heydər Əliyev adına Azərbaycan Ali Hərbi Məktəbinə daxil olan kursantların andiçmə mərasimi keçirilib.
Müdafiə Nazirliyinin mətbuat xidmətindən AZƏRTAC-a bildiriblər ki, hərbi məktəbin şəxsi heyətinin, kursantların valideynlərinin iştirakı ilə keçirilən təntənəli mərasimdə döyüş bayrağı hərbi marşın sədaları altında sıra meydanına gətirilib.
Azərbaycanın suverenliyi, ərazi bütövlüyü uğrunda şəhid olan Vətən övladlarının və ümummilli lider Heydər Əliyevin xatirəsi bir dəqiqəlik sükutla yad edilib, dövlət himni səsləndirilib.
Kursantlar Vətənə sədaqət andı içdikdən sonra hərbi marşın sədaları altında tribuna önündən keçiblər.
Sonra valideynlər hərbi məktəbdə kursantlar üçün yaradılan yüksək təlim-tədris, məişət şəraiti ilə tanış olublar.