Bakı, 3 may (AZƏRTAC, Əhməd Məmmədov). Tam mübaliğəsiz demək olar ki, son 45 ildə bu günlər anadan olmasının 91-ci ildönümünü qeyd etməyə hazırlaşdığımız xalqımızın ümummilli lideri, müasir müstəqil Azərbaycan dövlətinin memarı və qurucusu Heydər Əliyev qədər dünyanın, keçmiş SSRİ-nin, o cümlədən Azərbaycanın gündəminə hakim olan ikinci bir şəxsiyyət tapmaq mümkün deyil.

Düz 45 ildir ki, ulu öndər Heydər Əliyev haqqında dünyanın müxtəlif ölkələrindən, müxtəlif dinlərin və dillərin daşıyıcıları olan ayrı-ayrı sənət və peşə sahibləri - siyasətçilər, dövlət xadimləri, hüquqşünaslar, müəllimlər, həkimlər, mühəndislər, elm, mədəniyyət xadimləri bu dahi şəxsiyyət haqqında öz fikir və düşüncələrini qələmə alır, nüfuzlu beynəlxalq tədbirlərin ali kürsülərindən Azərbaycan xalqının XX əsrdə yetişdirdiyi ən böyük şəxsiyyət - Heydər Əliyev haqqında xoş sözlər deyilir.

Zənnimizcə, bu məqamda Ümummilli Liderimizin çağdaş dünya tarixində yerini və rolunu müəyyən etmək üçün onun müasirləri olan dünyanın tanınmış liderlərinin bir neçəsinin fikirlərini xatırlatmaq yerinə düşər.

BMT-nin sabiq baş katibi Butros Qali: “Azərbaycan Respublikasının prezidenti Heydər Əliyevin simasında özümə yaxın dost və sirdaş tapmağımdan məmnunam. Mən Heydər Əliyevə böyük hörmət və ehtiram bəsləyirəm, onun siyasi fəaliyyətini və məharətini, uzaqgörənliyini yüksək qiymətləndirirəm”.

ABŞ-ın keçmiş prezidenti Corc Buş: “Dünyada tanınmış görkəmli dövlət xadimi Heydər Əliyevin şəksiz liderliyinə, cəsarətinə, misilsiz dünyagörüşünə və nadir natiqlik istedadına valehəm”.

UNESCO-nun sabiq baş direktoru Federiko Mayor: “Siz bütün dünyanın etiraf etdiyi görkəmli lidersiniz”.

Fransa Respublikasının keçmiş prezidenti Jak Şirak: “Azərbaycanın Avropa ölkələri ailəsində özünəlayiq yer tutmasını böyük təcrübəyə malik, şöhrətli dövlət xadimi Heydər Əliyevin uzaqgörən, müdrik siyasətinin gözəl bəhrəsi kimi dəyərləndirirəm. Azərbaycanın Avropa Şurasına qəbul edilməsi, bu ölkədə insan haqlarının qorunması, demokratiyanın möhkəmlənməsi, daim inkişafda olması məhz Heydər Əliyevin siyasətinin nəticəsidir.

... Azərbaycanın bəxti onda gətirib ki, bu ölkəyə prezident Heydər Əliyev kimi böyük siyasi iradəyə, zəngin dövlətçilik təcrübəsinə malik, müdrik, uzaqgörən və nüfuzlu dövlət xadimi rəhbərlik edir.

Mən prezident Heydər Əliyevə dərin hörmət bəsləyirəm”.

Gürcüstanın sabiq prezidenti Eduard Şevardnadze: “Heydər Əliyev dünya qarşısında xidmətlərinə görə, beynəlxalq aləmdə tanınmış siyasət və dövlət xadimi kimi, Gürcüstanın və gürcü xalqının dostu kimi bizə əziz və doğmadır. Qəzetlərimizin “polad iradəli Əliyev” yazdığı kimi, o, həqiqətən də polad iradəyə malik nadir şəxsiyyətdir. Məhz onun cəsarəti sayəsində Azərbaycan güclü, müstəqil, firavan bir ölkəyə çevrilməkdədir. Heydər Əliyev siyasət meydanına Azərbaycanın ağır, mürəkkəb vaxtında yenidən gəlmişdir, bir çox çətinliklərə sinə gərərək Azərbaycanı böhranlı vəziyyətdən xilas etmişdir”.

Ukraynanın keçmiş prezidenti Leonid Kuçma: “Belə bir hal heyranlıq doğurur ki, hətta ən çətin sınaqlar zamanı da Siz xalqın birliyini qoruyub saxlaya bildiniz. Bunsuz hər hansı dövlətin varlığı ağlasığmazdır.

Cənab Heydər Əliyev, Sizə həqiqətən qibtə edirəm. Bunu doğrudan da çox ciddi deyirəm. Çünki burada qısamüddətli dövlət səfərində olarkən başa düşdüm ki, Heydər Əliyev Azərbaycan xalqının hamı tərəfindən qəbul edilən Lideridir”.

... Azərbaycan xalqının hamı tərəfindən qəbul edilən Lideri! Necə də yerində deyilmiş, necə də sərrast ifadə edilmiş kəlamdır!

Bəli, Ulu Öndər indiyədək dünyada heç bir siyasətçinin, dövlət xadiminin qalxa bilmədiyi bu zirvəyə özünün 80 illik həyatının hər anını mənsub olduğu xalqın xoşbəxt bu gününə, nurlu sabahına həsr etməklə, öz titanik fəaliyyəti, əməli ilə hər bir azərbaycanlının qəlbində özünə əbədi abidə ucaltmaqla yüksəlmişdir.

Azərbaycanlılar Ukraynanın sabiq prezidenti Leonid Kuçmanın dilindən çıxan və Ulu Öndərimizin bütün siyasi və dövlət fəaliyyətini tam dolğunluğu ilə əhatə edən bu reallığı 1969-cu il iyulun 14-də ümummilli lider Heydər Əliyevin o vaxtkı Azərbaycan Sovet Sosialist Respublikasının rəhbəri seçilən gündən görüb hiss etməyə başlamışlar. Doğrudur, titanik idarəçilik və siyasi uzaqgörənlik keyfiyyətlərinə malik olan Heydər Əliyevin liderlik, daim öndə getmək bacarığı həmin günədək də, yəni, bu dahi şəxsiyyətin dövlət təhlükəsizliyi orqanlarında çalışdığı illərdə də özünü göstərmişdir. Lakin xalqımız özünün dahi rəhbərinin sözün əsl mənasında nələrə qadir olduğunu Azərbaycan Kommunist Partiyası Mərkəzi Komitəsinin 1969-cu il 14 iyul plenumundan sonra tam dolğunluğu ilə görüb qiymətləndirə bilmişdir.

O vaxtki gəncliyin - indiki yaşlı və nisbətən orta nəslin yaddaşında həmin illər respublikanın ictimai-siyasi, sosial-iqtisadi, mədəni həyatında baş vermiş köklü dəyişikliklərin xoş xatirəsi kimi qalmışdır. Başqa sözlə, bugünkü yaşlı və nisbətən orta nəslin hər bir nümayəndəsi 60-cı illərin sonundan başlayaraq respublikamızın həyatına yeni ruh, yeni nəfəs gətirən titanik şəxsiyyət Heydər Əliyev Azərbaycanın simasını tamamilə dəyişən, ölkə həyatının bütün sahələrində qarşısıalınmaz tərəqqiyə yol açan böyük reformasından bəhrələnmişdir.

...Yaxşı yadımdadır, hərbi xidmətdən qayıtdıqdan az sonra - 1972-ci ildə ali təhsil almaq arzusu ilə sənədlərimi həmin vaxt Azərbaycan ali təhsilinin bayraqdarı olan Azərbaycan Dövlət Universitetinin (indiki Bakı Dövlət Universiteti) tarix fakültəsinə vermişdim. Onu da xüsusi qeyd etməliyəm ki, 1970-ci illərin əvvəllərinə qədər Azərbaycanın təhsil sistemində hökm sürən gizli-açıq rüşvətxorluq, “tapşırmaq” mühitinə görə mənim də daxil olduğum nisbətən aztəminatlı ailələrin uşaqları nə qədər savadlı, qabiliyyətli olsalar da, sənədlərini Bakı Dövlət Universiteti kimi aparıcı ali təhsil müəssisəsinə verməyə cürət etmirdilər. Səbəb isə yuxarıda qeyd etdiyim amillə bağlı idi. Digər həmyaşıdlarımla birlikdə həmin vaxt məni də universitetə qəbul olunmaq fikrinə düşməyə ruhlandıran respublikanın yeni rəhbərinin başqa sahələrdə olduğu kimi, təhsildə də haqqı-ədaləti, şəffaflığı bərqərar etmək istiqamətində atdığı qətiyyətli addımlar olmuşdu.

Sözün qısası, imtahanları verib müvəffəq qiymətlər aldım. Lakin müsabiqə böyük olduğundan başqa abituriyentlər kimi, mənim də ali məktəbə qəbul olunmaq şansım o qədər də yüksək deyildi. Aparılan qətiyyətli mübarizəyə hər vəchlə müqavimət göstərməyə çalışan “qara qüvvələr” özlərinin “siyahılarını” qəbul etdirmək niyyətindən əl çəkmirdilər. Çünki gəzən söz-söhbətlərdən belə məlum olurdu ki, universitetin rəhbərliyi müsabiqə zamanı eyni səviyyədə bal toplayan abituriyentlər arasında həmin il orta məktəbləri bitirənlərə üstünlük vermək niyyətindədir.

Çox keçmədən həmin niyyətin reallaşdırılması istiqamətində addımlar atılmasının şahidi olduq. Məsələ burasında idi ki, iyunun 12-də başa çatmış imtahanın nəticələrinə əsaslanaraq universitet rəhbərliyi tərəfindən adları qəbul olunanların siyahısına salınıb təsdiq olunmaq üçün Azərbaycan KP MK-nın müvafiq şöbəsinə təqdim edilən siyahıda mənim və mənim kimi hərbi xidmətdən yeni gələn digər gənclərin adları yox idi.

Sonrakı proseslər respublikanın yeni rəhbərinin bu məsələdə haqqa-ədalətə söykənən qərarının mənim kimi gənclərin xeyrinə dəyişməsi ilə nəticələndi. Başqa sözlə, iyunun 12-də başa çatmış imtahanın nəticələri uzağı bir həftə ərzində məlum olması nəzərdə tutulduğu halda, ulu öndər Heydər Əliyevin göstərişi əsasında Azərbaycan KP MK-da imtahanın nəticələri ilə bağlı aparılan ciddi araşdırmalardan sonra, nəhayət, iyunun 28-də Bakı Dövlət Universitetinin tarix fakültəsinə qəbul olunanların siyahısı bu ali təhsil ocağının divarlarından asıldı.

Universitetə qəbul olunanların siyahısında öz adımı görərkən keçirdiyin sevinc hisslərini günü bu gün də Ulu Öndərimizə minnətdarlıq hissi ilə xatırlayıram. Həmin vaxtdan keçən 42 ildə nail olduqlarıma görə dahi rəhbərimizə borclu olmağım faktı bir an da məni tərk etmir. Qətiyyən şübhəm yoxdur ki, bu gün Azərbaycanda mənim kimi Ulu Öndəri minnətdarlıq hissi ilə xatırlayanlar yüz minlərlə, milyonlarladır...