HÖKUMƏT ŞƏKİDƏKİ KƏNDLƏRİN SOSİAL PROBLEMLƏRİ İLƏ MARAQLANIRLAR
Şəki Şəhər İcra Hakimiyyətindən AZƏRTAC- ın müxbirinə bildirmişlər ki, hökumət nümayəndələri əvvəlcə Qafqazın ən qədim alban məbədinin yerləşdiyi Kiş kəndinə gəlmiş, ümummilli liderimiz Heydər Əliyevin şəxsi tapşırığına əsasən inşa edilməkdə olan 640 yerlik orta məktəb binasında aparılan son tamamlama işləri ilə tanış olmuşlar. Kənd sakinləri yeni dərs ilinədək istifadəyə verilməsi nəzərdə tutulan bu məktəbə ulu öndərin adının verilməsi ilə bağlı müraciətlərinin dövlətimizin başçısı İlham Əliyevə çatdırılmasını xahiş etmişlər.
Oxud kəndində yeni istifadəyə verilmiş orta məktəbə baş çəkmiş, həmçinin azsaylı xalqların nümayəndələrindən olan ləzgilərin yaşadığı Şin kəndinə gələrək yerli sakinlərlə görüşmüş, onların sosial problemləri ilə maraqlanmışlar.
Daha sonra hökumət nümayəndələri Baş Göynük kəndində yerli sakinlər üçün uzun illərdən bəri ciddi problemə çevrilmiş, kəndi iki hissəyə bölən Şin çayı üzərində uzunluğu 180 metrə yaxın olan körpünün inşa edilməsi ilə bağlı aparılan hazırlıq işləri ilə tanış olmuşlar. 3,5- 4 milyard manata xərclənəcək körpüdə tikinti işlərinə başlanılması üçün hazırda maliyyə mənbələri müəyyənləşdirilir. Rayonun Baş Layski kəndində keçirilən görüşdə isə ətraf kəndlərin sakinləri də iştirak etmişdir.
