SİYASƏT
HYUSTONDA ARDNŞ-İN DƏSTƏYİ İLƏ KEÇMİŞ BAKILILARIN GÖRÜŞÜ OLMUŞDUR
AZƏRTAC xəbər verir ki, ABŞ-ın Hyuston şəhərində Azərbaycan Respublikası Dövlət Neft Şirkətinin (ARDNŞ) dəstəyi ilə burada yaşayan keçmiş Azərbaycan vətəndaşlarının görüşü olmuşdur.
ARDNŞ-dən bildirmişlər ki, Hyuston-Bakı Qardaşlaşmış Şəhərlər Assosiasiyasının təşkilatçılığı ilə keçirilmiş görüşdə ötən 10 ildə Azərbaycanın neft sənayesinin inkişafına töhfələr vermiş azərbaycanlı və qeyri-azərbaycanlı hyustonlular iştirak etmişlər. Tədbirə qatılan 100-dək “köhnə bakılı” Azərbaycan paytaxtında birgə işdən tanış olduqları dostları ilə görüşmüş, ölkəmizin neft sənayesinin inkişafında qazandıqları təcrübəni və Bakıda keçirdikləri illəri minnətdarlıqla xatırlamışlar.
Görüşdə son illər Azərbaycanda əldə olunan sosial-iqtisadi nailiyyətlər haqqında danışılmış, uğurlardan bəhs edən videofilmlər nümayiş etdirilmişdir.
bp şirkətinin təmsilçisi Piter Karrager belə görüşlərin əhəmiyyətindən danışmışdır.
Sonda qeyd olunmuşdur ki, iki neft paytaxtı-Bakı və Hyuston arasında biznes, mədəniyyət və təhsil sahəsində əməkdaşlıq münasibətlərini inkişaf etdirən Hyuston-Bakı Qardaşlaşmış Şəhərlər Assosiasiyası əvvəllər Bakıda yaşamış hyustonlular icması üçün gələcəkdə də belə tədbirlərin keçirilməsini planlaşdırır.