ICESCO Beynəlxalq Əlillər Günü münasibətilə müraciət yayıb
Qahirə, 4 dekabr, AZƏRTAC
İslam Dünyası Təhsil, Elm və Mədəniyyət Təşkilatı (ICESCO) Beynəlxalq Əlillər Günü münasibətilə müraciət yayıb. AZƏRTAC xəbər verir ki, təşkilatın müraciətində COVID-19 pandemiyasının tüğyan etdiyi bir şəraitdə fiziki əngəlli insanlar üçün səhiyyə xidmətləri, təhsil və iş imkanlarının təmin edilməsinin zəruriliyi vurğulanır.
Müraciətdə qeyd olunur ki, dünyada təqribən 1 milyard insan fiziki qüsur və müxtəlif xəstəliklərin səbəb olduğu məhdudiyyətlərdən əziyyət çəkir. Müasir dövrdə texnologiyalardan və süni intellektdən istifadə etməklə onların həyat şəraitini yaxşılaşdırmaq və cəmiyyətə daha fəal inteqrasiya olunmalarını təmin etmək mümkündür. Əlilliyi olan şəxslərin COVID-19-a yoluxma ehtimalının yüksək olmasını da nəzərə almaq, onları xüsusi qayğı ilə əhatə etmək lazımdır. Bu məqsədlə ICESCO əlillər üçün proqram və layihələr həyata keçirir. “Arzuladığımız cəmiyyət” adlı proqramda fiziki qüsuru olan insanların təhsil və səhiyyə xidmətlərinin yaxşılaşdırılması istiqamətində tədbirlər görülməsi də nəzərdə tutulub.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
