İki dəfə yaralanmış döyüşçü: İşğaldan azad olunmuş torpaqlara fəxrlə gedirəm
Bakı, 3 oktyabr, AZƏRTAC
Şanlı Zəfər tariximizin beşinci ildönümünü yaşayırıq. Vətən müharibəsi dövründə 17 yaşım var idi, döyüşləri kənardan izləməyə məcbur idim. Silahlı Qüvvələrimiz tərəfindən 44 gün ərzində əldə olunan tarixi Qələbə mənim qəti qərar qəbul etməyimə səbəb oldu. Həmin torpaqlarda xidmət etməyi qarşıma məqsəd qoydum.
Bunu AZƏRTAC-a açıqlamasında 2023-cü il sentyabrın 19-20-də Azərbaycan Ordusunun həyata keçirdiyi lokal xarakterli antiterror əməliyyatlarının iştirakçısı, qazi Pərviz Veyisov bildirib.
2022-ci ilin yanvarında Vətənə borcunu ödəməyə yollanan Pərviz komando hərbi hissələrindən birində həqiqi hərbi xidmət keçib. Həmin müddətdə elə komando kimi Vətənin keşiyini çəkməyi qərarlaşdıran Veyisov müvafiq kurslardan uğurla keçərək istəyinə nail olub. 2023-cü ilin iyul ayından müddətdən artıq həqiqi hərbi xidmət hərbi qulluqçu kimi xidmətə başlayıb: “Antiterror əməliyyatları başlayanda iki ay idi ki, komando kimi xidmət edirdim. Vətən müharibəsində döyüşməyi necə ürəkdən istəmişdimsə, sanki Yaradan səsimi eşitmişdi. Tanrı mənə ərazi bütövlüyümüz uğrunda haqq savaşımızın sonuncu mərhələsinin - Zəfər tariximizin 23 saat 43 dəqiqəlik uğurlu antiterror əməliyyatının iştirakçısı olmağı nəsib etdi. Sentyabrın 19-da Xankəndi və Xocavənd istiqamətlərində hərbi əməliyyatlara qoşuldum. Həmin döyüşlərdə iki dəfə yaralandım. Belə ki, pusquya düşmüşdük, hər tərəfdən atəş altında idik. Yaralılarımız və şəhidlərimiz var idi. Mən yaralı olan silahdaşlarıma yaxınlaşıb, vəziyyətlərini öyrənmək istəyərkən snayper gülləsinə tuş gələrək yaralandım. Sentyabrın 20-si səhər saat 5-in yarısı pusqudan çıxa bildik. Yaralıların və şəhidlərin təxliyə edilməsinə başlanmışdı. Silahdaşlarım məni də döyüş meydanından çıxaran zaman düşmənin atdığı minaatan mərmisi yaxınlığımıza düşdü. Nəticədə qəlpə yaraları da aldım. Aldığım yaralardan sonra artıq xidmətimi davam etdirə bilmədim”.
Pərviz Veyisov deyib ki, hərb sahəsində qulluq etmək arzusu yarımçıq qalsa da, həlledici döyüşlərin iştirakçısı olmaqdan qürur duyur. “Döyüşdüyüm torpaqlara ayaq basanda bir başqa cür oluram. Abadlıq-quruculuq işləri aparılan torpaqları gördükcə müqəddəs amal uğrunda canından keçən qəhrəmanlar, çiyin-çiyinə döyüşdüyüm silahdaşlarım yadıma düşür. Döyüş yoldaşlarım üçün darıxsam da, onları dərin hörmət və ehtiramla xatırlayır, fəxr hissləri duyuram. O torpaqlara minlərlə qəhrəmanın son nəfəsi ilə “can gəldi”. Qalib Ordunun mənsubu, ərazi bütövlüyümüz və suverenliyimiz uğrunda gedən döyüşlərin iştirakçısı olmaq çox qürurvericidir", - deyə o vurğulayıb.
Qeyd edək ki, Pərviz Veyisov müdafiə nazirinin əmri ilə “Hərbi xidmətdə fərqlənməyə görə” 3-cü dərəcəli medalla təltif olunub.
Bölmənin digər xəbərləri
