İlin ən yaxşı “iPhone” smartfonları müəyyənləşib
Bakı, 27 noyabr, AZƏRTAC
“CNet” jurnalistləri 2025-ci ildə satılan ən yaxşı “Apple” smartfonlarının siyahısını tərtib ediblər.
AZƏRTAC xəbər verir ki, müvafiq məqalə media orqanının saytında dərc olunub. Mütəxəssislər “iPhone 17” modelini ABŞ brendinin ən yaxşı smartfonu adlandırıblar. Onun 120Hz displeyi və 256GB daxili yaddaşı ilə sələfindən daha yaxşı olduğu deyilir. Smartfon, həmçinin daha sürətli enerji doldurma xüsusiyyətinə malikdir. Bununla belə, “iPhone 16” şirkətin 2025-ci ildə ən çox satılan smartfonu olub.
Məqalə müəllifləri, eyni zamanda “iPhone 17 Pro Max” modelini “Apple” şirkətinin ən qabaqcıl cihazı hesab ediblər.
Ultra nazik “iPhone Air Apple” isə ən zərif və dəbli telefon seçilib: “Əgər siz dizaynı hər şeydən üstün tutursunuzsa, bu cihaz əla seçimdir”. Mütəxəssislər, həmçinin “iPhone 16e” smartfonunun münasib qiymətini, əla batareya ömrünü, sürətini və hərtərəfli xüsusiyyətlərini müsbət qiymətləndiriblər.
“Counterpoint Research” analitiklərinin proqnozuna görə, “Apple” 14 ildə ilk dəfə olaraq smartfon tədarükündə “Samsung” şirkətini qabaqlaya bilər. Bu, “iPhone 17” seriyasının kommersiya uğuru sayəsində mümkün olacaq.
Bölmənin digər xəbərləri
