İLKİN EHTİMALA GÖRƏ, BAKI-SUPSA KƏMƏRİNİ OĞRULAR ZƏDƏLƏYİBLƏR
Xəbər verdiyimiz kimi, yanvarın 18-də Bakı-Supsa qərb ixrac boru kəmərinin Şərqi Gürcüstanın Qori rayonundakı Sveneti kəndi yaxınlığından keçən hissəsində neft sızmış və 200 kvadratmetrlik sahədə yer səthinə yayılmışdır. Bu barədə saat 15.30 radələrində bir nəfər yerli sakin bp şirkətinin Tbilisidəki ofisinə xəbər vermişdir. Şirkətin boru kəməri üzrə mühafizə xidmətinin əməkdaşları dərhal hadisə yerinə getmiş və xəbəri təsdiq etmişlər.
Neft sızmasının qarşısını almaq üçün dərhal lazımi tədbirlər görülmüş, saat 15.45-də kəmərin zədələnmiş hissəsinin hər iki tərəfində olan təhlükəsizlik siyirtmələri bağlanmış və Səngəçal terminalından kəmərə neft vurulması dayandırılmışdır. Eyni zamanda “Çıraq” platformasından hasil olunan neft də bir neçə saat ərzində yalnız Səngəçal terminalındakı ehtiyat anbarlara nəql edilmişdir.
Beynəlxalq Əməliyyat Şirkətinin ictimaiyyətlə əlaqələr şöbəsindən AZƏRTAC-ın müxbirinə demişlər ki, Azərbaycan və Gürcüstanın müvafiq qurumlarının sıx əməkdaşlığı çərçivəsində görülən həmin tədbirlər öz səmərəsini vermişdir. Təmir işləri başa çatdırılmış və kəmər işə salınmışdır. Hazırda kəmər normal gücü ilə işləyir. Hadisənin səbəblərini öyrənmək üçün təhqiqat aparılır. İlkin ehtimallara görə, kəməri oğurluq məqsədilə zədələmişlər.
Bölmənin digər xəbərləri
