İndoneziyada Anak-Krakatau vulkanı son sutka ərzində iki dəfə püskürüb
Tokio, 11 aprel, AZƏRTAC
İndoneziyada yerləşən Anak-Krakatau vulkanı son sutka ərzində iki dəfə püskürüb.
AZƏRTAC xəbər verir ki, bu barədə “The Jakarta Post” qəzeti İndoneziya Təbii Fəlakətlərin Qarşısının Alınması üzrə Vulkanologiya və Geologiya Mərkəzinə istinadla məlumat yayıb.
Mərkəzin mütəxəssislərinin bildirdiyinə görə, birinci püskürmə zamanı kül dumanı 200 metr, bundan bir saat sonra baş verən ikinci püskürmə zamanı isə 500 metr hündürlüyə qalxıb. Qeyd edilir ki, vulkan külü şimal istiqamətində hərəkət edib. Kül dumanının şənbə günü səhər saatlarına qədər davam etdiyi bildirilir.
Mərkəzin rəhbəri Pak Kasbaninin bildirdiyinə görə, bu dəfə baş verən püskürmə 2018-ci ilin dekabrında və 2019-cu ilin yanvarında baş verən püskürmələrlə müqayisədə zəifdir.
Nəşrin bildirdiyinə görə, polis və hərbçilər ehtiyac yaranacağı təqdirdə vulkana yaxın məsafədə yaşayan əhalini təxliyə etmək üçün hazır vəziyyətdə dayanıblar.
Həmçinin qeyd edilir ki, Anak-Krakatau adasında yerləşən vulkan 1883-cü ildə baş vermiş güclü zəlzələdən sonra Krakatau vulkanının yerində əmələ gəlib. Həmin vaxt vulkan püskürməsi nəticəsində 295 şəhər və digər yaşayış məntəqəsi dağılıb, 36 min insan həlak olub.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
