İnsanların maddi rifahının gücləndirilməsi dövlətin prioritet istiqamətlərindəndir
Bakı, 9 yanvar, AZƏRTAC
Ölkəmizdə həyata keçirilən dövlət siyasətinin başlıca istiqamətlərindən biri olan sosial siyasətin mərkəzində Azərbaycan vətəndaşının maddi rifahının yaxşılaşdırılması dayanır.
Bunu AZƏRTAC-a açıqlamasında Milli Məclisin deputatı Fatma Yıldırım deyib.
Ötən illər ərzində Azərbaycanda əhalinin sosial müdafiəsinin gücləndirilməsi istiqamətində əhəmiyyətli addımlar atıldığını diqqətə çatdıran F.Yıldırım qeyd edib: “Aztəminatlı ailələr, təqaüdçülərin və digər güzəştli təbəqələrin sosial rifahını yüksəltmək üçün sistemli tədbirlər həyata keçirilir. Görülən bu işlərin nəticəsidir ki, Azərbaycanda pensiya təminatı və digər sosial göstəricilər bir sıra sahələrdə MDB ölkələri arasında ilk pillələrdə qərarlaşıb. Pandemiyanın tüğyan etdiyi, sərt karantin zamanında da heç bir sosial layihə təxirə salınmadı. Əksinə, ölkədə bir çox yeni sosial layihələrə start verildi”.
Deputatın sözlərinə görə, yanvarın 5-də Prezident İlham Əliyevin imzaladığı “Əhalinin sosial rifahının yaxşılaşdırılması sahəsində əlavə tədbirlər haqqında” Sərəncam dövlətimizin başçısının daim vətəndaşları düşündüyünü və onların sosial rifahının yaxşılaşdırılması istiqamətində addımlar atdığını bir daha təsdiqləyir. Bu Sərəncam bir daha təsdiq edir ki, dövlət siyasətinin mərkəzində Azərbaycan vətəndaşı dayanır.
“Ümumilikdə minimum əməkhaqqı artımı 700 min, əmək pensiyasının minimum məbləğinin artırılması təqribən 100 min şəxsi əhatə edəcək. Başqa bir vacib məqam isə ondan ibarədir ki, artımdan sonrakı rəqəmləri bir neçə il bundan əvvəlki rəqəmlərlə müqayisə etsək, müvafiq ödənişlərin iki dəfədən çox artdığının şahidi oluruq. Konkret desək, minimum əməkhaqqı 2,7 dəfə artırılaraq 130 manatdan 345 manata, minimum pensiya 2,5 dəfə artırılaraq 110 manatdan 280 manata çatdırılıb. Göründüyü kimi, rəqəmlər arasında da ciddi fərqlər mövcuddur. Sözsüz ki, dövlətimizin başçısının imzaladığı müxtəlif proqram və layihələrə həssas qruplardan olan şəxslərin sosial vəziyyətinin yaxşılaşdırılması əsas prioritet kimi daxil edilir. Verilmiş qərarın başqa mühüm bir məqamı isə ondan ibarətdir ki, mövcud imkan və ehtiyaclar öyrənilməklə sosial müavinətlərin və təqaüdlərin məbləğlərinin artırılması ilə bağlı yeni anons verilir, daha geniş və əhatəli dəstək mexanizmlərinin həyata keçirilməsini özündə ehtiva edir. Müvafiq dövlət qurumlarının ilkin təqdimatlarında da 2023-cü ildə sosial ödənişlərdə yeni artımlar üçün əlavə 750 milyon manat vəsait nəzərdə tutulması və artımların 1,9 milyon vətəndaşı əhatə etməsi göstərilir. Bu fakt isə məhz əhatəliliyin təmin olunmasını bir daha sübut edir”, - deyən Fatma Yıldırım əlavə edib ki, bu tədbirlər əhalinin rifahının daha da yüksəlməsi ilə nəticələnəcək. Bu və digər faktlar sübut edir ki, dövlətimiz insanların maddi rifahının güclənməsini prioritet istiqamət kimi qarşıya qoyub.
Bölmənin digər xəbərləri
