İntizam Komitəsinin qərarı ləğv edilib, iş əlavə araşdırılması üçün geri qaytarılıb
Bakı, 18 aprel, AZƏRTAC
AFFA-nın Apellyasiya Arbitraj Tribunalı I Liqada çıxış edən “Difai” klubu tərəfindən verilən apellyasiya şikayətini qismən təmin edib.
AFFA-dan AZƏRTAC-a verilən məlumata görə, qurumun İntizam Komitəsinin “Karvan”la XX tur oyunu ilə əlaqədar olaraq I liqanın Əsasnaməsinin tələblərinin pozulmasına görə klubun 50, oyun günü planının pozulmasına görə isə 100 manat cərimə edilməsi barədə qərarları Apellyasiya Arbitraj Tribunalı tərəfindən ləğv olunub. Məsələ yenidən baxılması üçün İntizam Komitəsinə qaytarılıb. Apellyasiya şikayətinin qalan hissəsi təmin edilməyib.
AFFA-nın Apellyasiya Arbitraj Tribunalı “Turan Tovuz” tərəfindən komandanın baş məşqçisi Kurban Berdiyev barədə verilən apellyasiya şikayətini isə təmin etməyib.
İntizam Komitəsinin Misli Premyer Liqasında “Sabah”la keçirilmiş XXX tur oyununun 19-cu dəqiqəsində K.Berdiyevin meydana daxil olaraq hakimin qərarına etiraz etdiyinə görə birbaşa qırmızı vərəqə aldıqdan sonra hakimləri təhqir etdiyi üçün 3 oyun şərti olmaqla 5 oyun cəzalanması, həmçinin klubun 4000 manat məbləğində cərimə olunması və şərti cəzaya dair 3 ay sınaq müddəti təyin olunması ilə bağlı qərarı dəyişdirilməyib.
Hər iki məsələ ilə bağlı maraqlı tərəflər Apellyasiya Arbitraj Tribunalının qərarından Lozannadakı (İsveçrə) Beynəlxalq İdman Arbitraj Məhkəməsinə (CAS) şikayət vermək hüququna malikdirlər.
Bölmənin digər xəbərləri
