DÜNYA
İordaniyada baş verən iğtişaşda polis zabiti həlak olub
Qahirə, 18 dekabr, AZƏRTAC
İordaniyanın Əl-Hüseyniyə şəhərində yanacağın qiymətlərinin qalxmasına etiraz edən sakinlər və polis arasında toqquşma baş verib. İğtişaş zamanı silahlı təxribatçıların açdığı atəş nəticəsində bir polis zabiti həlak olub, daha iki qanun keşikçisi yaralanıb.
AZƏRTAC xəbər verir ki, əraziyə cəlb olunan əlavə polis qüvvələri iğtişaşda iştirak edən 44 nəfəri həbs ediblər. İordaniya Kralı II Abdulla dövlət televiziya kanalında çıxışında bildirib ki, “dövlətə qarşı silah qaldıranlar ağır şəkildə cəzalandırılacaqlar”. Daxili işlər naziri Mazen Əl-Fəraya isə iğtişaşın təşkilatçılarının tapılacağını və onların qanun qarşısında cavab verəcəklərini bəyan edib.
İordaniyada yanacağın qiymətinin iki dəfəyə yaxın qalxmasına etiraz edən sürücülər və mağaza sahibləri bir həftədir tətil edirlər. Etirazları yumşaltmaq istəyən hökumət inflyasiyanın təsirini azaltmaq məqsədilə imkansız ailələrə maliyyə yardımı göstərəcəyini bildirib.
AZƏRTAC-ın xüsusi müxbiri
Qahirə