İordaniyada Ulu Öndər Heydər Əliyevin 100 illiyi ilə əlaqədar seminar-sərgi keçirilib
Bakı, 19 sentyabr, AZƏRTAC
Azərbaycanın İordaniyadakı səfirliyinin təşkilatçılığı ilə Ulu Öndər Heydər Əliyevin anadan olmasının 100 illiyi və Azərbaycan-İordaniya diplomatik əlaqələrinin 30-cu ildönümü münasibətilə bu ölkənin “Əmvac” Mədəniyyət və İncəsənət Assosiasiyası ilə birgə xəttatlıq sənətinə həsr olunmuş seminar-sərgi keçirilib.
Səfirlikdən AZƏRTAC-a bildiriblər ki, Assosiasiyanın direktoru Yaser Caraba çıxış edərək, müasir Azərbaycan dövlətinin banisi Heydər Əliyevin əziz xatirəsinə və iki qardaş ölkə arasında diplomatik əlaqələrin yaradılmasının 30 illiyinə həsr edilmiş tədbir iştirakçılarını təbrik edib.
Tədbirə qatılan İordaniyadakı Alman Arxeologiya İnstitutunda xəttat-arxeoloq kimi fəaliyyət göstərən xanım Serin əl-Şobaki xəttatlıq sənətinin tarixi, növləri, Şərq və Qərb dünyasında bu sənətin inkişafı və fərqliliyi, o cümlədən Osmanlı dövrü xəttatlığın xüsusiyyətlərindən bəhs edən mühazirə ilə çıxış edib, hazırladığı materialları iştirakçılara nümayiş etdirib.
Səfir Eldar Səlimov Azərbaycanın etnoqrafik abidələri, ədəbiyyatı və təsviri incəsənətində xəttatlığın rolundan danışıb, ölkəmizdə orta əsrlərə aid əlyazmalarda müxtəlif xəttatlıq nümunələrindən istifadə edildiyini, xüsusən də elmi əsərlərin nəsx xətti ilə yazıldığını, tariximizin bir dövründə bu istiqamətin tənəzzülə uğramasına baxmayaraq, müasir dövrdə hələ də istifadə edildiyini tədbir iştirakçılarının diqqətinə çatdırıb.
Mühazirə və çıxışlardan sonra tədbirə gələn iyirmi iordaniyalı xəttatın əsərləri nümayiş olunub, Azərbaycan Respublikasının Dövlət Himninin ərəb dilinə tərcümə olunmuş və “Divan” üslubunda yazılmış Tofiq Abdunun əsəri səfirliyə hədiyyə edilib.
Sonda tədbir iştirakçılarına diplomlar təqdim edilib.
Tədbirdə İordaniyanın bir sıra universitetlərinin professorları, yazıçılar, tarixçılər, burada yaşayan azərbaycanlılar, həmçinin Fələstin dövlətindən gələn kalliqrafiya sahəsi üzrə təhsil alan tələbələr iştirak ediblər.
Bölmənin digər xəbərləri
