“İPƏK YOLU” LAYİHƏSİNƏ 950 MİN DOLLAR QRANT AYRILMIŞDIR
Daşkənddə çap edilən həftəlik “Novosti Uzbekistana” qəzeti yazır ki, Asiya İnkişaf Bankı “İpək yolu” layihəsinə texniki kömək göstərilməsi üçün 950 min ABŞ dolları həcmində qrant ayırmışdır. Bu yardımdan məqsəd Mərkəzi Asiya dövlətlərinin iqtisadi inkişafına və həyat səviyyəsinin yüksəldilməsinə kömək göstərməkdir. Texniki kömək regional layihələrin hazırlanması, nəqliyyat, energetika və ticarət sahələrində əməkdaşlığın genişləndirilməsinə imkan açacaqdır.
Layihə Mərkəzi Asiya regional iqtisadi əməkdaşlıq təşkilatına daxil olan ölkələri - Azərbaycan, Çin Xalq Respublikası, Qazaxıstan, Qırğızıstan, Monqolustan, Tacikistan və Özbəkistanı əhatə edir. Qəzet yazır ki, Mərkəzi Asiya dövlətləri arasında sıx tarixi və etnik əlaqələr mövcuddur və onların Əfqanıstanla mühüm iqtisadi münasibətləri var. Ona görə də Əfqanıstanın bu layihəyə daxil edilməsi, Cənubi Asiya ilə əməkdaşlığın inkişafı, habelə Monqolustanın və Çin Xalq Respublikasının Sintzyan-Uyğur muxtar dairəsi ilə münasibətlər qurulması nəzərdə tutulur.
Materialda deyilir ki, əsas məsələlərdən biri də Türkmənistanın Mərkəzi Asiya regional iqtisadi əməkdaşlıq təşkilatına cəlb olunmasıdır.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
