İşğaldan azad edilmiş ərazilərdə həyat qaynayır, muğam sədası eşidilir…
Naxçıvan, 14 may, AZƏRTAC
“Bölgələrdən AZƏRTAC üçün yazırlar”: Azərbaycan Yazıçılar Birliyinin üzvü, Naxçıvan Muxtar Respublikasının Əməkdar jurnalisti Fərəc Fərəcovun Prezident İlham Əliyev və birinci xanım Mehriban Əliyevanın mayın 9-10-da Qarabağa səfərlərinə dair məqaləsini təqdim edirik.
Sevincli günlər yaşayırıq. Əhvali-ruhiyyəmiz yaxşıdan da yaxşıdır. Niyə də olmasın!? Müstəqil Azərbaycanımızda, xüsusilə erməni işğalından xilas edilmiş Qarabağda, onun şəhər və kəndlərində sürətlə həyata keçirilən möhtəşəm quruculuq layihələri, təbii gözəlliklərə insan ağlı, zəkası ilə yeni gözəlliklər bəxş olunması bir ziyalı, Vətən övladı kimi məni də hədsiz sevindirir, qürurlandırır.
Hər dəfə televiziyadan Prezidentimizin Qarabağla bağlı səfərlərini, orada günbəgün artan sayagəlməz yenilikləri seyr etməkdən doymuram. Dövlət televiziyasında xəbər öncəsi quruculuq işlərini əks etdirən qısa süjetləri təkrar-təkrar seyr etdikcə köksüm fərəhlə dolur.
Prezidentimizin bölgələrə, xüsusilə də Qarabağa hər səfəri möhtəşəm açılışlarla və yeni təməlqoymalarla səciyyələnir. Bu günlərdə, daha doğrusu mayın 9-10-da Prezident İlham Əliyevin və Birinci vitse-prezident Mehriban Əliyevanın Şuşada, Xocalıda bir sıra obyektlərin açılışında iştirakı, Qarabağın giriş qapısı sayılan Ağdama səfərləri yaddaqalan və unudulmaz oldu. Şuşa rayonunun Daşaltı kənd məscidinin tikilib istifadəyə verilməsi milli-mənəvi dəyərlərimizə qayıdışın növbəti ifadəsinə çevrildi. Hafizəmiz təzələndi. Xatırladım ki, düşmən işğal dövründə 60-dan çox məscidimizi dağıdıb, təhqir etmişdi. Bu vəhşiliyi əks etdirən görüntülər hər birimizin ürəyini dağlamışdı. Ancaq şükürlər olsun ki, aradan ötən 5 ilə yaxın müddətdə Prezident İlham Əliyevin rəhbərliyi ilə mənəvi dəyərlərimizin ayrılmaz parçası sayılan məscidlərimiz də yenidən bərpa olunur, yenidən qurulur.
Hər dəfə olduğu kimi, Prezidentimizin Şuşa, Xocalı, Ağdam səfərini də telekanallardan diqqətlə izlədim. Tarixi Zəfərimizin rəmzi sayılan Şuşa bu gün əzəli görkəminə qovuşur, baxdıqca baxılır, göz oxşayır ana yurdumuz. Mayın 9-da dördüncü yaşayış kompleksinin təməlinin qoyulması qayıdışımızın Şuşa səhifəsinin daha da zənginləşəcəyinin müjdəçisi oldu. Eyni zamanda, uzun illər yaralı yerimiz olan, qanadıqca qanayan “Xocalı” adlı yaramıza məlhəm sürülür, Xocalıya da həyat qayıdır. Ötən il rayonda 32 il öncə yarımçıq qalmış toy mərasiminin keçirilməsi hər birimizi sevinc göz yaşlarına boğmuşdu. Bəli, illər ötsə də 1992-ci ilin 26 fevralını unutmuruq və heç vaxt da unutmayacağıq. Ali Baş Komandanımızın rəhbərliyi ilə quracağımız yeni Xocalı isə düşmənə ən böyük göz dağımız olacaq.
Ağdamda Muğam Mərkəzinin, dəmiryol vağzalının və avtovağzal kompleksinin açılışları, Kəngərli kəndindəki yeniliklər, yeni evlərin sahiblərinə paylanması isə dövlətimizin böyük iqtisadi, siyasi, sosial gücünün bariz göstəricisidir. İşğaldan azad olunmuş ərazilərdə düşmənin törətdiyi dağıntılar üzərində yenidən göz oxşayan şəhər və kəndlərin salınması, 30 il həsrətdə qalmış keçmiş məcburi köçkünlərin doğma yurda qayıtması, onların sosial-mədəni ehtiyaclarının ödənilməsi dövlətimizin ən prioritet məqsədlərindəndir.
Dövlət başçımızın Ağdama səfəri, möhtəşəm açılış tədbirlərini gerçəkləşdirməsi, yaddaqalan səmimi, təsirli görüşləri mayın 10-da oldu. Bu gün heç də təsadüfi seçilməmişdi. Çünki həmin tarix Azərbaycan xalqının Ümummilli Lideri Heydər Əliyevin doğum günüdür. Bu dahi şəxsiyyət çətinə, dara düşmüş xalqımızı yad əllərdən, qanlı düşmən caynağından xilas edib, inkişaf yoluna çıxartdı, müstəqilliyimizi əbədi etdi. Onun qurub-yaratdığı yenilənmiş Azərbaycanı isə siyasi varisi və özü qədər inandığı Prezident İlham Əliyev bir daha yüksəltdi, torpaqlarımızı erməni işğalçılarından tam azad etdi. Və beləliklə “qalib ordu”, “qalib Azərbaycan” ifadələri bütün dünyaya yayıldı.
Müzəffər Ali Baş Komandanımızın mayın 10-da reallaşan Ağdam səfəri Ulu Öndərin ruhunu şad etməklə bərabər, onun siyasi xəttinin nə dərəcədə geniş və dərin çalarlarla davam etdirildiyinin bariz göstəricisi oldu. Ağdam Muğam Mərkəzinin açılışı və orada Prezident İlham Əliyevin ürəkləri titrədən mənalı, düşündürücü çıxışı, hafizələrdən silinməyəcək canlı konsert, tədbir sonrası görüşlər, məşhur “Qarabağ” mahnısının birlikdə ifa edilməsi dövlət və xalqın birliyinin əsl təntənəsinə çevrildi. Bu qəlb coşduran səhnələri seyr etdikcə mədəniyyətimizə, o cümlədən musiqimizə, muğam sənətinə nə qədər dəyər verildiyi gözlərimiz önündə canlanır.
Bir sözlə, indi Şuşaya, Xocalıya, Ağdama, işğaldan azad edilmiş digər ərazilərə qayıdan əbədi həyatın, əbədi dəyərlərin və muğamın sədasını duyuruq…
Bölmənin digər xəbərləri
