İsmayıllıda görülən işlər rayonun beynəlxalq turizm marşrutuna daxil edilməsinə geniş imkanlar açır
İsmayıllı, 6 mart, Adil Ağayev, AZƏRTAC
İsmayıllı xarici turistlərin sevimli məkanı kimi tanınır. Azərbaycanın turizm üçün əlverişli olan bu dilbər guşəsində müxtəlif sənətkarlıq növləri yüksək inkişaf edib ki, bu da İsmayıllını turistlər üçün maraqlı məkana çevirib.
İsmayıllı rayonunun coğrafi mövqeyi, flora və faunasının zənginliyi, mədəni-tarixi irsi turizmin inkişafı üçün olduqca əlverişli imkanlar açır. Böyük Qafqaz dağlarının cənub yamaclarında dağlar və meşələr əhatəsində yaşıllığa qərq olan bu diyarda dağ çayları, uca qayalar, təbii və süni göllər, zəngin heyvanat və bitki aləmi bölgəyə gələn hər kəsin qəlbində xoş təəssüratlar oyadır. Girdiman, Göyçay və Ax-Ox çayları bu rayonun ərazisindən keçir. Qalacıq, İstisu, Burovdal, Müdrüsə kəndlərinin yaxınlığında 50-25 metr yüksəklikdən tökülən şəlalələr, Babadağ yaxınlığında dəniz səviyyəsindən 3400-3500 metr yüksəklikdə, bir-biri ilə yanaşı yerləşən 3 təbii göl, eləcə də Kürdmaşı və Aşıqbayramlı kəndlərinin yaxınlığındakı 2 süni göl bu bölgənin inciləridir.
Zəngin bitki və heyvanat aləminə malik olan İsmayıllı rayonunun ərazisində çoxlu dərman bitkiləri yetişir. Rayonun təbiətində maral, dağ keçisi, qaban, ayı, canavar, tülkü, çaqqal və başqa heyvanlara rast gəlmək mümkündür. 1969-cu ildə rayonda 5778 hektar ərazisi olan İsmayıllı qoruğu yaradılıb.
Özünəməxsus adət-ənənələri ilə seçilən İvanovka kəndi İsmayıllı rayonunda bu gün istər yerli, istərsə də xarici turistlər üçün çox maraqlı və cəlbedici məkandır. Hazırda kənddə vaxtilə Azərbaycana köçürülən malakanlar nəslinin davamçıları yaşayır. Olduqca əməksevər olan bu kəndin sakinləri qədim adət və ənənələrini indi də qoruyub saxlayırlar.
İsmayıllı xalq yaradıcılığının bəhrəsi olan mədəniyyət abidələri ilə də zəngindir. Bu abidələr əcdadlarımızın qoyub getdiyi cansız, lakin həqiqətləri əks etdirən, “danışa bilən” yadigarlar, tarixin əsl mühafizəçiləridir. Adı VII əsrdən məlum olan, Girdimançayın sahilində dəniz səviyyəsindən 1200 metr yüksəklikdə yerləşən Lahıc qəsəbəsi isə xarici turistlər arasında daha çox tanınır. Bu yer Azərbaycanın ən qədim sənətkarlıq mərkəzlərindən biridir. Sənətkarların misdən döymə üsulla hazırladıqları silahlar, məişət qabları və təsərrüfat alətləri Lahıcı çoxdan məşhurlaşdırıb. Öz əcdadlarının işlərini davam etdirən misgərlər, sərraclar, döymə iş ustaları, dulusçular, dəmirçilər, papaqçılar indi də az deyil. Lahıc, eləcə də digər qədim yaşayış məskəni olan Basqal tarix-mədəniyyət qoruqları bu gün də turistlərin ən çox maraq göstərdikləri yerlərdir. Basqalda XVII əsrə aid məscid, hamam, kəlağayı evi, Lahıcda isə 1791-ci ilə aid Bədöyün, Zəvəro, Ağolı məscidləri və Zəvəro bulağı mühafizə edilir.
Rayonda qədim və orta əsrlərə aid abidələr də az deyil. Xanagah kəndindəki VII əsrə aid Qız qalası, Sulut kəndində adına rəvayətlər qoşulan XVIII əsrə aid Fitdağ qalası, Qalacıq kəndi yaxınlığında Qasımxan qalası, Girdimançay sahilində Qafqaz Albaniyasının hökmdarı Cavanşirin adı ilə bağlı VII əsrə aid Girdiman qalası və s. bu gün turistləri özünə cəlb edən tarixi abidələrdir.
İsmayıllı-Lahıc, İsmayıllı-Basqal-Xankəndi-Sulut, İsmayıllı-Talıstan-Cavanşir qalası, İsmayıllı-Qalacıq-Qasımxan qalası, İsmayıllı-Qalagah-Mollaisaqlı marşrutları xarici qonaqların ən çox istifadə etdikləri turist marşrutlarıdır.
Son illər İsmayıllı getdikcə inkişaf edir, gündən-günə gözəlləşir. Rayonda “Şereton-İsmayıllı” otel kompleksinin istifadəyə verilməsi, yeni turizm istirahət mərkəzlərinin tikintisi İsmayıllının beynəlxalq turizm marşrutuna daxil edilməsinə geniş imkanlar açır. Bu gün rayonda dağ, atçılıq, ekoturizm sahələrinin inkişafı istiqamətində yeni layihələr həyata keçirilməkdədir.
İsmayıllıda görülən işlər rayona gələn turistlərin sayını da artırmaqdadır. Təkcə 2014-cü ildə İsmayıllıya 96 min nəfər turist gəlib ki, bu da 2013-cü illə müqayisədə 14 min nəfər çoxdur. Əminliklə demək olar ki, turizmin inkişaf etdirilməsi çərçivəsində həyata keçirilən tədbirlə nəticəsində builki göstəricilər daha da yüksək olacaq.
Bir sözlə, ölkəmizdə turizm sektoruna göstərilən diqqət və qayğı İsmayıllı rayonunda da bu sahənin dinamik və sürətli inkişafını təmin edib. Bu diqqət və qayğı getdikcə gözəlləşən, müasirləşən, özünün əsrarəngiz təbiəti ilə göz oxşayan, tarixi abidələri ilə diqqəti cəlb edən bölgəni məşhur turizm zonasına çevirməkdədir.
Bölmənin digər xəbərləri
