İSPANİYA İRAQDA MÜXBİRLƏRİ ÖLDÜRƏN ABŞ TANKÇILARINI AXTARIR

20.10.2005 [19:25]
Çap et
A⁺ A^-

AZƏRTAC Assoşieyted Press Agentliyinə istinadla xəbər verir ki, Madrid hakimi Santyaqo Pedras üç amerikalı hərbçinin - 2003-cü ilin aprelində Bağdadın “Fələstin” mehmanxanasını atəşə tutan tankın heyət üzvlərinin beynəlxalq axtarışda elan olunduğu barədə order imzalamışdır. O vaxt iki jurnalist – Röyter agentliyindən ukraynalı Taras Protsyuk və onun Telecinco kanalından ispaniyalı həmkarı Xose Kouso həlak olmuşlar.

İspaniyalı hakim demişdir ki, ABŞ hakimiyyət orqanları təhqiqata kömək göstərmək istəmirlər, ona görə də şübhəli bilinən şəxslərin İspaniyaya təhvil verilməsi onları dindirmək üçün yeganə üsuldur. İspaniya qanunlarına görə, ölkənin vətəndaşlarına qarşı cinayət törədilən dövlətdə onun hakimiyyət orqanları təhqiqat aparmaqdan imtina edərsə, İspaniya ədalət məhkəməsinin işi öz sərəncamına götürmək hüququ vardır.

ABŞ Müdafiə Nazirliyi bu məlumatla bağlı mövqeyini açıqlamaqdan imtina etmişdir.