İstanbul Universitetində Azərbaycan kinosunun tarixinə dair təqdimat olub
İstanbul, 26 sentyabr, Günel Karatepe, AZƏRTAC
İstanbul Universitetinin Türkiyyat Araşdırmaları İnstitutunda Türk Dünyası Kino Forumu və mükafatlı sənədli film nümayişi keçirilib. Tədbirdə azərbaycanlı ssenarist, teatr və kino tənqidçisi, İstanbul Universitetinin doktorantı Ameliya Ömerova “Azərbaycan kinosunda tarixi və mədəni izlər” mövzusunda təqdimatla çıxış edib.
AZƏRTAC xəbər verir ki, məruzədə “Fətəli Xan” filmi təhlil olunub, sovet dövründə Azərbaycan kinosunun üzləşdiyi çətinliklər və filmlərdə qorunub saxlanılan tariximiz, milli ənənələrimizdən bəhs edilib.
Bu il 10-cu dəfə təşkil olunan forum Türk Dünyası Jurnalistlər Federasiyası tərəfindən, Türkiyənin Daxili İşlər Nazirliyinin Vətəndaş Cəmiyyəti ilə Əlaqələr Baş İdarəsinin dəstəyi ilə keçirilib.
Azərbaycan, Şimali Kipr Türk Cümhuriyyəti, İran, Bolqarıstan, Qazaxıstan və Qırğızıstan da daxil olmaqla 10 ölkədən film istehsalçılarının qatıldığı forum Türk dünyasında kino sahəsində əlaqələrin daha da genişləndirilməsini hədəfləyir.
Tədbirdə Türk Dünyası Jurnalistlər Federasiyasının Prezidenti Menderes Demir, İstanbul Universiteti Türkiyyat Araşdırmaları İnstitutunun müdir müavini Mehmet Sait Türkhan və Milliyyətçi Hərəkat Partiyasının (MHP) İstanbul Təşkilatının Türk dünyasından məsul vilayət başçısı İsmail Akgöz çıxış edərək Türk dünyası kinosunun inkişafının əhəmiyyətini vurğulayıblar.
M.Demir rəhbərlik etdiyi təşkilatın əsas məqsədinin türk icmalarının kino vasitəsilə mədəni bağlarını gücləndirmək olduğunu vurğulayaraq, tarix, dil və mədəniyyət birliyinə malik olan bu icmaların kino vasitəsilə quracaqları dialoqla həm keçmişi xatırlayacaqlarını, həm də gələcəyi birgə quracaqlarını qeyd edib.
Forum çərçivəsində təşkil olunan iki ayrı paneldə kinematoqrafiyanın müxtəlif aspektləri müzakirə olunub. Panellərdə “Azərbaycan kinosunda tarixi və mədəni izlər”, “Kiprdə kino”, “Türk kinosunun gələcəyində süni intellekt” mövzularda təqdimatlar olub.
Tədbir “Keçmişdən günümüzə” filmi, eləcə də “Vira” və “Novruz” sənədli filmlərinin təqdimatı ilə davam etdirilib.
Bölmənin digər xəbərləri
