İSTANBULDA HEYDƏR ƏLİYEV ADINA PARKIN VƏ ÜMUMMİLLİ LİDERİMİZİN BÜSTÜNÜN AÇILIŞ MƏRASİMİ
Büstün yaxınlığındakı binada ümumilli liderimizin həyat və fəaliyyətindən bəhs edən “Əsrlərə bərabər bir ömür” adlı fotosərgi təşkil olunmuşdu. Binanın divarındakı mərmər lövhədə Heydər Əliyevin məşhur “Türkiyə və Azərbaycan bir millət, iki dövlətdir” kəlamı həkk edilmişdi.
Azərbaycanın və Türkiyənin dövlət himnləri səsləndi.
Mərasim iştirakçılarına ümummilli liderimiz Heydər Əliyevin zəngin həyat yolu və fəaliyyəti barədə məlumat verildi.
İstanbulun minlərlə sakininin toplaşdığı mərasimi Şişli bələdiyyəsinin sədri Mustafa Sarıgül açdı.
ŞİŞLİ BƏLƏDİYYƏ SƏDRİ MUSTAFA SARIGÜLÜN
ÇIXIŞI
- Ölkəmizə şərəf gətirən, varlıqları ilə İstanbulumuzu, Şişlimizi qürurlandıran hörmətli Prezident və hörmətli xanımı!
İstanbulumuzun və Şişlimizin inkişafında bizi heç vaxt yalnız qoymayan hörmətli valim və hörmətli xanımı!
Hörmətli qonaqlar!
Şişli bu gün tarixi günlərdən birini yaşayır. Bu tarixi günümüzün yaşanmasında bizə çox gözəl bir təklif verən Azərbaycanın İstanbuldakı konsulu İbrahim Nəbioğluna hüzurunuzda təşəkkür etmək istəyirəm. Hörmətli Prezidentimiz Heydər Əliyevin yer üzündə sülhə, demokratiyaya, qardaşlığa və Türkiyə Cümhuriyyətinə verdiyi əhəmiyyət dünyada türklər tərəfindən, bizlər tərəfindən heç vaxt, əsla unudula bilməz. Prezidentiniz hörmətli Heydər Əliyevin gözəl sözlərini yenidən xatırlatmaq istərdim: “Türkiyə və Azərbaycan bir millət, iki dövlətdir”. Bu söz bizlərə rəhbər olmalıdır. Bu söz iki ölkə arasında ticarət, iqtisadiyyat, mədəniyyət sahəsindəki əlaqələrimizin ən yüksək səviyyəyə çıxması üçün çox böyük işarədir.
Hörmətli Prezident Heydər Əliyevin hər zaman qəlbimizdə və ürəyimizdə yaşadacağımız adını ölkəmizin, İstanbulun ən gözəl nöqtələrindən biri olan Şişlidə, gündə milyonlarla yurddaşımızın keçdiyi bu nöqtədə əbədiləşdirməkdən böyük qürur və xoşbəxtlik hissi keçirirəm.
Hörmətli Prezident, Sizi xanımınızla birlikdə Şişlidə qarşılamaqdan şərəf və xoşbəxtlik hissi keçirirəm. Təşrifləriniz Türkiyə və Azərbaycan arasındakı əlaqələrin inkişafı və möhkəmləndirilməsinə böyük töhfə vermişdir.
Hörmətli Zeyno Barana bu əlaqələrin beynəlxalq səviyyəyə çıxarılmasındakı xidmətlərinə görə hüzurunuzda çox təşəkkür edirəm. Azərbaycan və Türkiyə xalqları dünyadakı inkişaf etmiş çağdaş və demokratik ölkələrlə olan əlaqələrini hər zaman davam etdirəcəklər. Azərbaycan və Türkiyə Cümhuriyyəti ən yüksək səviyyəyə, inşallah əmin addımlarla irəliləyəcəkdir.
Şişli bələdiyyəsinin sədri kimi bu gün mən Sizi burada qarşılamaqdan xoşbəxtlik hissi keçirirəm. Millət vəkili olduğum dövrdə və ondan əvvəlki vaxtlarda Ankarada apardığımız söhbətlərdə mən Sizin bu yerlərə gəlmənizi arzu etmişdim və həmin söhbətlərdə Azərbaycan xalqının və dünya xalqlarının Sizdən çox şeylər gözlədiyini ifadə etmişdim. Bu söhbətlər on il əvvəl olmuşdur və bu gün Sizi burada Prezident kimi qarşılamaqdan xoşbəxtlik hissi keçirirəm.
Son olaraq demək istəyirəm ki, ulu öndər Atatürkümüz və Heydər Əliyevimiz, Türkiyə Cümhuriyyətimiz və Azərbaycanımız əbədiyyətə qədər yaşayacaqdır. Bizlərin vəzifəsi Azərbaycan bayrağını və Türkiyə Cümhuriyyətinin bayrağını, inşallah, ən yüksəklərə qaldırmaqdır.
Hörmətli Prezident, Sizə hörmət və ehtiramlarımı çatdırıram.
X X X
Sonra İstanbul valisi Müəmmər Gülər çıxış etdi.
İSTANBUL VALİSİ MÜƏMMƏR GÜLƏRİN ÇIXIŞI
- Dostumuz, qonşumuz, qardaşımız Azərbaycan Respublikasının hörmətli Prezidenti zati-aliləri İlham Əliyev və möhtərəm xanımı!
Şişli bələdiyyəsinin sədri, hörmətli səfir, hörmətli baş konsul!
Əziz istanbullular, hörmətli mətbuat nümayəndələri!
Bu gün çox xoşbəxt bir gün yaşayırıq. İstanbul böyük bir zirvə toplantısının dəyərli qonaqlarını, Şişli isə çox dəyərli bir qardaşımızı qarşılayır. Prezident kimi İstanbula ilk dəfə gəlirsiniz. Xoş gəlmisiniz, hörmətli Prezident və xanımı. Əziz qızımız Leyla xanıma də xoş gəldiniz deyirəm.
Hörmətli Prezident, Azərbaycan xalqının böyük sevgisi ilə bütünləşib əbədiyyətə qovuşan böyük dövlət adamı Prezident Heydər Əliyevin ruhu qarşısında bir daha baş əyir, onu hörmət və ehtiramla yad edirik. Azərbaycan xalqı ilə türk xalqının ortaq dəyərinin birləşməsində, iki xalqın dostluğunun möhkəmlənməsində lider rolu oynayan hörmətli Prezident Heydər Əliyevi Azərbaycan xalqı kimi, Türkiyə xalqı da bağrına basır. Bu gün İstanbulda, Şişlidə yaşayan insanlarımız bu xatirəni əbədiyyətə qədər yaşadacaqlar. İstanbulun yaraşıqlı rayonu olan Şişli gözəl bir xatirəni ömür boyu yaşatmaqdan qürur duyacaqdır. Bunu həyata keçirən Şişli bələdiyyəsinin sədri hörmətli Musfata Sarıgülü və hörmətli iş yoldaşlarını, əziz şişlililəri səmimi qəlbdən təbrik edirəm. İstanbul xoş məramın, barışın, mədəniyyətlərin kəsişdiyi bir mərkəzdir. Bu mənada Şişli rayonu çox mühüm işlərin görüldüyü rayondur. Bu rayonda Türkiyə ilə dostluq edən bir çox insanın xatirəsi əbədiləşdirilmişdir. Ancaq Heydər Əliyevin xatirəsinin əbədiləşdirilməsi burada çox mühüm yer tutacaqdır.
Hörmətli Prezident, bu mənalı günlərdə bizlərlə bərabər olub, mərhum atanız hörmətli Prezident Heydər Əliyevin xatirəsinə yaradılan və istanbullular tərəfindən hər zaman sevgi ilə yad ediləcək bu parkın açılışında iştirak etmənizdən məmnun olduğumuzu xüsusilə ifadə etmək istəyirəm. Türk xalqı ilə Azərbaycan xalqının yaxınlaşmasında, bir-biri ilə qaynayıb-qarışmasında mərhum atanızın çox böyük əməyi olmuşdur. Bir az əvvəl hörmətli bələdiyyə sədrimiz söylədi, “Bir millət, iki dövlət” ifadəsi, əlbəttə ki, əbədiyyətə qədər yaşayacaqdır. Bu sözlər çox mühümdür. Bu, ürəkləri bir olan insanları ifadə edir. Bu, insanların bərabərliyini ifadə edir, atanız mərhum Heydər Əliyevdən sonra müqtədir iradənizlə Azərbaycanın daha inkişaf etmiş, daha bəxtiyar ölkə kimi irəliləməsində Sizin xidmətlərinizin çox mənalı olduğunu ifadə edir. Bu birlik əbədiyyətə qədər davam edəcəkdir. Sizə İstanbula, Sişli rayonuna xoş gəldiniz deyirəm. Mərhum atanızın xatirəsinin əbədiyyətə qədər yaşamasını diləyirəm. Bir millətin iki ayrı dövləti olaraq güc birliyi ilə, könül birliyi ilə, inşallah, bu dostluğumuz əbədi olaraq davam edəcəkdir.
Yaşasın Türkiyə-Azərbaycan dostluğu!
Yaşasın Heydər Əliyevin xatirəsi!
Allah rəhmət eləsin!
Sizə bir daha “Xoş gəlmisiniz!” deyirəm.
X X X
Azərbaycan Prezidenti İlham Əliyev mərasimdə nitq söylədi.
Bölmənin digər xəbərləri
