İsveç Estoniyada həbsxana icarəyə götürür
Stokholm, 26 sentyabr, Nərgiz Cəfərli, AZƏRTAC
İsveç parlamentində Estoniyada həbsxana yerlərinin icarəyə götürülməsinə dair sazişin təsdiqlənməsi üçün lazımi səs çoxluğu formalaşıb.
AZƏRTAC xəbər verir ki, qərar Sosial Demokrat Partiyasının hökumətin təklifini dəstəkləməsindən sonra mümkün olub.
Saziş Tartu islah müəssisəsində 400-ə qədər yerin istifadəsini nəzərdə tutur ki, bu da 600-ə yaxın məhbusun yerləşəcəyinə imkan verəcək. İlk məhbusların 2026-cı ilin yayında köçürülməsi planlaşdırılır.
Buna səbəb ağır cinayətlərə qarşı mübarizə çərçivəsində verilən uzunmüddətli cəzaların artması nəticəsində İsveç həbsxanalarında yaranan həbsxana yerlərinin çatışmazlığıdır. İsveç Həbsxana və Probasiya Xidməti və həmkarlar ittifaqları ifrat sıxlığın həm işçilər, həm də məhbuslar üçün ciddi risk yaratdığı barədə xəbərdarlıq ediblər.
Sosial Demokrat Partiyasının nümayəndələri qeyd edirlər ki, xaricdə həbsxana yerlərindən istifadə etmək qərarı ümumilikdə uğursuzdur və tezliklə yeni həbsxanalar tikməyə çağırırlar.
Onların fikrincə, hökumət İsveçdə yeni həbsxanaların tikilməsi üçün daha çox səy göstərməlidir. Bu, həm həbsxana və probasiya xidmətlərinin xeyrinə olar, həm də İsveç vətəndaşlarını yeni iş yerləri ilə təmin edərdi.
Eyni zamanda, partiya müvəqqəti həll yollarının lazım olduğunu etiraf edir.
Ədliyyə naziri Qunnar Strömmer vurğulayıb ki, İsveç və Estoniya insan hüquqları və qanunun aliliyi sahəsində ortaq prinsipləri bölüşür. Onun sözlərinə görə, məhbusların lazımi şəraitdə saxlanması ilə bağlı kifayət qədər zəmanət verilib.
Bölmənin digər xəbərləri
