İSVEÇRƏDƏ FELDŞER AZI 27 PASİYENTİN HƏYATINA SON QOYMUŞDUR
AZƏRTAC-ın xarici informasiya agentliklərindən aldığı xəbərə görə, doqquz ölüm hadisəsinə görə məsuliyyəti öz boynuna götürmüş isveçrəli feldşer, 32 yaşlı Rocer Andermatt sonradan daha 18 cinayətdə əli olduğunu etiraf etmişdir. Onun qurbanları Altsgeymer xəstəliyindən əziyyət çəkən, yaxud başqa səbəblərdən himayəyə ehtiyacı olan ahıl adamlar olmuşlar.
“Əzrail” adı qazanmış R. Andermatt xəstələrini ya onlara yüksək dozalarda dərman preparatları verərək, ya plastik paket, yaxud da adyal vasitəsilə boğaraq öldürürmüş. Caninin etirafına görə, bu cinayətləri o, xəstələrin iztirablarına son qoymaq məqsədi ilə törədirmiş.
Cani 2003-cü ilin iyununda həbs olunmuşdur. O zaman Lüsern şəhərindəki qocalar evinin müdiriyyəti bir neçə xəstənin ölümünü şübhəli hesab etmişdi.
Polisin verdiyi məlumata görə, bütün cinayətlər 1995-ci ilin sentyabrından 2003-cü ilin iyununadək törədilmişdir. İndi müttəhim məhkəmə qarşısında cavab verəcəkdir.
