İtaliya azərbaycanlıların gözü ilə: Rimini
Bakı, 20 dekabr, E.Eyyubov, AZƏRTAC
Rimini İtaliyanın Emiliya-Romanya regionunda - Adriatik dənizinin sahilində yerləşən, rusdilli turistlərin ən sevimli səyahət istiqamətlərindən biri olan qədim şəhərdir. Onun iki minillikdən artıq zəngin tarixi şəhərin tarixi mərkəzindəki qədim Roma abidələrinin Rimininin ən məşhur yetirməsi - Federiko Fellininin adı ilə bağlı olan məkanlarla ahəngi fonunda unikal ab-hava yaradır. Bütün bunlar piyada yolla İtaliyanın ən populyar Roman Rivyerası çimərliklərindən bir neçə dəqiqə aralıda yerləşir.
Rimini Qədim Romanın və müasirliyin fonunda
Rimini İtaliyanın mərkəzi hissəsində ən çox səyahətçinin olduğu sahilyanı şəhərdir. Burada çimərlikdə istirahəti ləziz yeməklərin, xüsusən dəniz məhsullarının dequstasiyası və tarix-mədəniyyət abidələri ilə tanışlıq ilə birləşdirmək istəyənlər üçün ideal şərait mövcuddur.
Şəhər mərkəzində gəzinti zamanı siz eramızdan əvvəl 268-ci ildən başlayan Rimininin tam yüksəlişi və süqutu tarixi ilə bağlı məlumatlar əldə edə bilərsiniz. Həmin dövrdə Roma imperatorları yaxınlıqdakı çayın adından götürülmüş Ariminum (hazırda o, Marekkya adlanır) yaşayış məskənini salıblar. Riminidə Romanın Via Flaminiya və Via Emiliya kimi bir neçə əsas yolları kəsişirdi və bunun sayəsində salınan qəsəbə tezliklə mühüm iqtisadi və mədəni mərkəzə çevrildi, onun əhəmiyyəti zamanla daha da artdı. Orta əsrlərdə Rimini İtaliya və Avropanın elmi və ədəbi dirçəlişinin beşiyinə çevrildi.
Riminidə İtaliyanın Qədim Roma dövrünə aid olan ən qədim abidələrindən biri - eramızdan əvvəl 27-ci ildə tikilmiş Avqust Tağı yerləşir. Zəfər Tağı Via Flaminiya yolunun başa çatmasının rəmzi idi və Riminini Roma ilə birləşdirirdi. Hazırda o, Tiberi körpüsü ilə birlikdə şəhərin rəmzlərindən biridir. Bu qədim abidə travertindən tikilib və hündürlüyü 17 metrdir. O, ilk mərhələdə yaxınlıqda izləri qalan şəhər divarlarının bir hissəsi olub.
Fotonun altındakı yazı - Avqust Tağı
Avqust Tağından Qədim Roma dövrünə aid daha bir abidəyə - amfiteatra bir neçə dəqiqə ərzində çatmaq olar. Bu abidə II əsrdə imperator Adiranın əmri ilə tikilib. Amfiteatr günümüzə yarı xarabalıq vəziyyətində gəlib çatıb, amma bunu digər Qədim Roma abidəsi - Avqust körpüsü və ya Tiberi körpüsünün vəziyyəti haqqında söyləmək olmaz. Məsələ burasındadır ki, həmin körpünün tikintisi imperator Oktavian Avqustun dövründə - 14-cü ildə başlayıb və onun varisi olmuş imperator Tiberinin zamanında, 20-ci ildə başa çatdırılıb. Beş tağı olan “iki imperatorun” piyada körpüsü Marekkya çayı üzərində təxminən 8 metrdir və Rimini şəhərinin tarixi mərkəzini Borqo San Culiano rayonu ilə birləşdirir. Qədim vaxtlarda dənizçilərin və balıqçıların kəndi olmuş Borqo San Culiano hazırda dar döngələri və taxta dirəklərlə yaraşıqlı evləri olan mənzərəli bir məhəllədir. Rayonun Marekkya çayı boyu uzanan sahəsi trattoriya və restoranların bol olduğu yerli sakinlərin sevimli istirahət məkanıdır. Biz 100 illik tarixi olan belə trattoriyalardan birində - “La Marianna”da şam yeməyinə getdik. Trattoriya ev mətbəxi və sərbəst şəraiti olan bir növ ailəvi restorandır. Burada balıq, tarak, karides və digər dəniz məhsulları təzə və mükəmməl hazırlanmışdı və “La Marianna”nın “Tripadvisor” səyahət veb-saytının yuxarı hissəsində yer alması təsadüfi deyil.
Şəhər mərkəzində gəzinti
Borgo San Giuliano bölgəsinə tez-tez gələnlərdən biri də burada öz filmləri və personajları üçün ilham alan rejissor Federiko Fellini idi. Rejissor 1920-ci ildə Riminidə anadan olub və 1939-cu ildə Romaya köçənə qədər burada yaşayıb. 2021-ci ildə Riminidə korifeyin yaradıcılığına həsr olunmuş muzey açılıb. Fellini Muzeyi iki yerdə - Castel Sismondo və Palazzo Vallonidə (burada “Fulgor” kinoteatrı da var) yerləşir. Castel Sismondo möhtəşəm qüllələri və divarları olan və Piazza Malatestada yerləşən XV əsrə aid qədim qaladır. Onun orta əsr interyerlərində siz Fellini Muzeyinin çəkilişlərdən rekvizitlər, kostyumlar, nadir sənədlər, rejissorun şəxsi əşyaları, audio və videomaterialları kimi eksponatları görə bilərsiniz.
Fotonun altındakı yazı: Kavur-Rimininin ən böyük meydanı
Riminidə gəzinti zamanı şəhərin ən böyük meydanı olan Kavura da baxmağa dəyər. Erkən orta əsrlərdə ticari və siyasi həyatın mərkəzi olmuş bu məkan indi də şəhərlilər üçün öz əhəmiyyətini qoruyub saxlayır. Burada 1204-1207-ci illərdə tikilmiş Palaçço del Arenqo sarayı yerləşir. Sarayda şəhər idarəsi fəaliyyət göstərir. Yaxınlıqdakı daha bir saray - Palaçço del Podesta 1330-cu ildə bənzər üslubda tikilib. Amma bu tikili özünün indiki görkəmini XVI əsrdən etibarən almağa başlayıb, həmin vaxt burada hazırda bələdiyyə idarələrinin ofislərinin yerləşdiyi Palaçço Qarampi tikilib. Elə həmin dövrdə - 1543-cü ildə şəhərin Pinya adlı fəvvarəsi inşa edilib.
1747-ci ildə tikilmiş Köhnə balıq bazarı tarixi meydana xüsusi gözəllik verir. Onun üç tağdan ibarət Qədim Roma üslubunda konstruksiyası var və daxildə istriya daşından olan iki sıra piştaxtalar qoyulub. Burada bir neçə yüzillik ərzində şəhər sahilində bol olan balıq və molyuska ticarəti aparılıb. İndi də ətrafda çoxlu restoran və mağazalar fəaliyyət göstərir.
Fotonun altındakı yazı: Köhnə balıq bazarı
Günəş, hava və su
Riminini məşhur edən ən əsas amil Adriatik dənizinin qumlu çimərlikləridir. Belə ki, bu şəhərdə bütün yollar yaxşı təchiz edilmiş sahilyanı əraziyə aparır. Çimmək üçün yararlı olan sahil zolağı 15 kilometrədək uzanır. Yeri gəlmişkən, Rimini Rusiyanın Soçi şəhəri ilə qardaşlaşıb. Buradakı sahildə bizim qaldığımız 4 ulduzlu “Milton” oteli yerləşir. Rahat otaqları, doydurucu səhər yeməyi, dəniz mənzərəli eyvanı bu otelə diqqət yetirmək üçün əsas verir.
Rimini sahili bu yaxınlarda davamlı inkişaf və ətraf mühitin mühafizəsi prinsiplərinə uyğun olaraq hazırlanmış və Parco del Mare (Dəniz parkı) adlandırılıb. Sahil boyu uzanan yaşıllıq vadiləri arasında velosiped yolları, uşaqlar üçün məkanlar, açıq idman zalları, çimərlik sahələri, voleybol və basketbol meydançaları var. Ən innovativ qurğular arasında Kennedi meydanında yerləşən 7 metr hündürlüyündə Sağlamlıq ağacının göstərmək olar. O, 400 kiloqramlıq Karrar mərmərindən hazırlanıb və artıq Aralıq dənizinin açıq səma altında ən böyük idman zalının simvoluna çevrilib.
Rimini haqqında reportajımızın yekununda onun şəhərətrafı əraziləri, xüsusən turistlər arasında populyar olan Santarcangelo-di-Romanya kommunası və onun labirintli mağaraları barədə xatırlatmaq istərdim. Riminidən buraya avtomobillə 20 dəqiqəyə çatmaq olar. Bu qəsəbədə qədim parkların kölgəli xiyabanlarında gəzə, tarixi binalara heyran ola, çoxsaylı sənətkarlıq emalatxanalarına və yerli məhsulların satıldığı mağazalara baş çəkə bilərsiniz. Ərazidə tapılan mağara və tunellərin mənşəyi və təyinat məqsədi hələ də sirr olaraq qalır. Mağaraların bəziləri turistlər üçün açıqdır. Təbii ki, Santarcangelo-di-Romanyanın hər yerində orijinal restoranlar var. Xülasə, yerli mətbəxin təamlarından ibarət nahar istənilən səyahətin ən yaxşı yekunu olacaq!
Bölmənin digər xəbərləri
