İTALİYADA “CƏNUBİ QAFQAZDA HƏLL OLUNMAMIŞ ETNİK MÜNAQİŞƏLƏR” MÖVZUSUNDA KONFRANS KEÇİRİLMİŞDİR
AZƏRTAC xəbər verir ki, İtaliyanın Padova şəhərində “Cənubi Qafqaz bölgəsində həll olunmamış etnik münaqişələr” mövzusunda konfrans keçirilmişdir. Məqsəd toplantı iştirakçılarına Cənubi Qafqazdakı etnik münaqişələr barədə məlumat vermək və onların həlli yolları ətrafında fikir mübadiləsi aparmaq olmuşdur.
Xarici Ölkələrdə Yaşayan Azərbaycanlılarla İş üzrə Dövlət Komitəsindən bildirmişlər ki, konfransa Azərbaycan, Gürcüstan və Ermənistanın İtaliyada fəaliyyət göstərən qeyri-hökumət təşkilatlarının nümayəndələri dəvət olunsalar da erməni təşkilatları tədbirə qatılmamışlar.
Konfransda Azərbaycanı təmsil edən “Dostluq” İtaliya-Azərbaycan Assosiasiyasının sədri Zaur Fərhadov 20 Yanvar faciəsi, Xocalı soyqırımı və ümumiyyətlə Ermənistan-Azərbaycan, Dağlıq Qarabağ münaqişəsinin tarixi barədə iştirakçılara ətraflı məlumat vermişdir. Tədbirdə, həmçinin Azərbaycanın Milli Qəhramanı, telejurnalist Çingiz Mustafayevin Xocalı soyqırımından çəkdiyi videokadrlar nümayiş etdirilmişdir.
Diskussiya zamanı Zaur Fərhadov Kosovo və Dağlıq Qarabağ münaqişələri arasındakı fərqi də izah etmiş, beynəlxalq qurumların Dağlıq Qarabağ münaqişəsinin həlli üçün ciddi səy göstərmələrinin vacibliyini diqqətə çatdırmışdır.
Bölmənin digər xəbərləri
