İtaliyanın Botanika Bağının nümayəndələri ekoloji parkda olmuşlar
Bakı, 11 dekabr (AZƏRTAC). İtaliya-Azərbaycan Forumu çərçivəsində Bakıda səfərdə olan İtaliyanın Sardiniya adasındakı “Sgaravatti Garden” Botanika Bağının rəhbəri, professor Rosi Zuliani Sgravattinin başçılıq etdiyi nümayəndə heyəti Azərbaycan Respublikası Dövlət Neft Şirkətinin (ARDNŞ) ekologiya idarəsinin ekoloji parkında olmuşdur.
ARDNŞ-dən AZƏRTAC-a bildirmişlər ki, görüşdə ekologiya idarəsinin əməkdaşları ekoloji parkın yaradılmasının tarixi, fəaliyyət istiqamətləri və gələcək planları barədə ətraflı məlumat vermişlər.
Qonaqlar qapalı şitilxanada olan toxum, böyütmə və oranjereya şöbələrində aparılan işlərlə yaxından tanış olmuş, onlara parkda Azərbaycan Respublikasının “Qırmızı kitabı”na salınmış bitkilərin artırılması yolları barədə geniş məlumat verilmişdir.
Nümayəndə heyətinin rəhbəri xanım Rosi Zuliani Sgravatti təmsil etdiyi şirkətin parksalma, landşaft dizaynı, bitkiçilik istiqamətində gördüyü işlərdən danışmış, bu sahədə əməkdaşlıqda maraqlı olduğunu bildirmişdir. O, ARDNŞ tərəfindən ekologiya sahəsində həyata keçirilən tədbirləri və əldə olunan nailiyyətləri müsbət qiymətləndirmişdir.
Bölmənin digər xəbərləri
