Kamançanın səsi ilə dünyanı dolaşan sənətçi: Elnur Mikayılov
Bakı, 10 iyul, AZƏRTAC
Azərbaycanın qədim simli alətlərindən olan kamança əsrlərdir milli ifaçılıq irsimizin ayrılmaz hissəsi kimi xalqımızın zəngin musiqi ənənələrini yaşadır. Özünəməxsus səsi və geniş ifadə imkanları ilə seçilən bu alət Azərbaycan musiqisinin dünyada tanıdılmasında mühüm rol oynayır. Bu sənəti peşəkarlıqla davam etdirən ifaçılardan biri də Beynəlxalq Muğam Mərkəzinin solisti Elnur Mikayılovdur.
Yaradıcılığı boyu 50-dən çox ölkədə keçirilən nüfuzlu beynəlxalq festival və konsert proqramlarında Azərbaycanı uğurla təmsil edən sənətçi Qran-Pri mükafatçısı, beynəlxalq və respublika müsabiqələrinin qalibidir. Onun son uğurlarından biri Özbəkistanın Namanqan şəhərində keçirilən III Beynəlxalq Maqom Festivalında rəhbərlik etdiyi “Simurq” Muğam Ansamblının birinci yerə layiq görülməsi olub.
AZƏRTAC-ın müxbiri ilə söhbətində Elnur Mikayılov bu uğurdan, yaradıcılıq yolundan və Azərbaycan musiqisinin beynəlxalq aləmdə qazandığı rəğbətdən danışıb.
Sənətçi musiqiyə marağının uşaqlıq illərindən yarandığını söyləyib. O, mərhum Xalq artisti Habil Əliyevin ifalarını dinlədikcə kamançaya sevgisinin artdığını və bu sənət yolunu seçdiyini vurğulayıb.
Elnur Mikayılov Bülbül adına Orta İxtisas Musiqi Məktəbində, Asəf Zeynallı adına Musiqi Kollecində, daha sonra isə Azərbaycan Milli Konservatoriyasında təhsil alıb. Peşəkar fəaliyyəti ərzində qazandığı uğurlar onun kamança ifaçılığı sahəsində tanınmış sənətçilərdən birinə çevrilməsinə imkan yaradıb.
O, 2002-ci ildə Qırğızıstanda keçirilən Beynəlxalq Musiqi Festivalında, 2010-cu ildə isə Türkmənistanda təşkil olunan Beynəlxalq Musiqi Festivalında Qran-Pri mükafatına layiq görülüb. 2018-ci ildə Azərbaycan İnstrumental Muğam Müsabiqəsində I yerə sahib olub, həmin il “Muğam Aləmi” Beynəlxalq Muğam Festivalının qalibi seçilib. 2024-cü ildə Özbəkistanın Səmərqənd şəhərində keçirilən “Şərq Təranələri” Beynəlxalq Musiqi Festivalında rəhbərlik etdiyi “Simurq” Muğam Ansamblı ilə Qran-Pri qazanan ifaçı, bu günlərdə Namanqanda keçirilən III Beynəlxalq Maqom Festivalında ansamblı ilə birlikdə I yerə layiq görülüb.
Özbəkistanda keçirilən festivalın Azərbaycan musiqisinə böyük maraq yaratdığını deyən Elnur Mikayılov müxtəlif ölkələrdən olan iştirakçıların milli musiqimizi yüksək qiymətləndirdiyini diqqətə çatdırıb. Onun fikrincə, Azərbaycan muğamının əsas üstünlüklərindən biri Şərq musiqisinin zənginliyini Avropa not sistemi ilə ahəngdar şəkildə birləşdirməsidir.
İfaçı ötən il Səmərqənddə keçirilən “Şərq Təranələri” Beynəlxalq Musiqi Festivalında da “Simurq” Muğam Ansamblının uğur qazandığını xatırladıb. Onun sözlərinə görə, 80-dən çox ölkənin iştirak etdiyi həmin müsabiqədə ansamblın Qran-Pri mükafatına layiq görülməsi Azərbaycan musiqisinin beynəlxalq səviyyədə yüksək qiymətləndirilməsinin göstəricisidir.
Elnur Mikayılovun fikrincə, Azərbaycan musiqisinin müxtəlif ölkələrdə maraqla qarşılanmasının əsas səbəbi onun zənginliyi və özünəməxsusluğudur. O hesab edir ki, milli musiqini dünyada daha geniş tanıtmaq üçün peşəkar yanaşma, yüksək ifaçılıq səviyyəsi və ənənəyə sadiqlik vacibdir.
“Ənənədən uzaqlaşmadan, kökə əsaslanaraq müasir yanaşma ortaya qoymaq mümkündür. Burada söhbət muğama təsadüfi elementlər əlavə etməkdən deyil, onun daxili imkanlarını düzgün şəkildə təqdim etməkdən gedir. Ənənənin özündə də müasirlik var və düzgün yanaşma olduqda bu, dinləyici tərəfindən daha yaxşı qəbul edilir”, – deyə sənətçi bildirib.
Hazırda Beynəlxalq Muğam Mərkəzinin solisti kimi fəaliyyət göstərən Elnur Mikayılov, eyni zamanda, Əmək və Əhalinin Sosial Müdafiəsi Nazirliyinin tabeliyində fəaliyyət göstərən DOST İnklüziv İnkişaf və Yaradıcılıq Mərkəzində musiqi istiqaməti üzrə baş mütəxəssisdir. O, burada müxtəlif sosial qruplardan olan şəxslərlə, o cümlədən şəhid ailələrinin üzvləri, aztəminatlı ailələrdən olan uşaqlar və əlilliyi olan şəxslərlə çalışaraq onların musiqi bacarıqlarının inkişafına dəstək verir.
Sənətçi fərdi dərslər də keçdiyini, müxtəlif ölkələrdən tələbələrinin olduğunu söyləyib. Onun sözlərinə görə, əsas məqsədi gənc ifaçılara öz təcrübəsini ötürmək, kamança sənətinin inkişafına töhfə verməkdir.
“İnsan nə qədər öyrənsə də, öyrənməli olduğu çox şey var. Biz də daim araşdırır, öyrənir və əldə etdiyimiz bilikləri gənc, istedadlı insanlarla bölüşməyə çalışırıq”, – deyə Elnur Mikayılov vurğulayıb.
Gənclərin kamançaya marağının davam etdiyini deyən ifaçı bu alətin gələcək nəsillər tərəfindən də yaşadılacağına inandığını bildirib. O, əsas məqsədinin Azərbaycan muğamını və milli musiqisini beynəlxalq səviyyədə layiqincə təbliğ etmək olduğunu qeyd edib.
Bölmənin digər xəbərləri
