Keçən il “Petkim”in məhsul satışı 1,8 milyon tona çatıb
Bakı, 2 mart, AZƏRTAC
“Petkim PetroKimya Holding A.Ş.”nin keçən il ümumi məhsul satışı 1,8 milyon tona çatıb.
AZƏRTAC xəbər verir ki, bu barədə şirkət məlumat yayıb. Bildirilir ki, həmin məhsulun 939 min tonu yerli bazarda satılıb, 880 min tonu isə ixrac olunub.
“Petkim PetroKimya Holding A.Ş.”nin icraçı direktoru Anar Məmmədov deyib ki, son illərdə “Petkim”in artan rentabelliyi və məhsuldarlığını 2019-cu ildə daha yüksək səviyyəyə çatdırmaq üçün plan hazırlayırıq.
Qeyd edək ki, SOCAR 2008-ci ildə “Petkim” şirkətinin səhmlərinin 51 faizini 2,04 milyard ABŞ dollarına alıb. Daha sonra Özəlləşdirmə İdarəsinə məxsus olan 10 faizlik payı alınıb və sonra o satılıb. O dövrdə “Petkim”in dövriyyəsi 2,1 milyard türk lirəsi olub. Bu illər ərzində “Petkim”in yaxşılaşdırılması üçün 760 milyon dollar investisiya qoyulub. Hazırda “Petkim” Türkiyənin ən böyük şirkətlərindən biridir. “Petkim” Türkiyənin neft-kimya məhsuluna olan tələbatının 20 faizini qarşılayır. “Petkim” illik 3,6 milyon ton neft-kimya məhsulu istehsal edir.
SOCAR 2008-ci ilin mayından etibarən Türkiyədəki fəaliyyətini “SOCAR Turkey Enerji A.Ş.” (STEAŞ) adı ilə davam etdirir. Hazırda STEAŞ “Petkim”də təxminən 51 faizlik paya sahibdir.
Bölmənin digər xəbərləri
