Kəlbəcərin milli iqtisadiyyata töhfəsi böyük olacaq ŞƏRH
Bakı, 21 avqust, AZƏRTAC
İşğaldan azad edilmiş ərazilərdə bərpa-quruculuq işləri ilə yanaşı köç prosesi – məskunlaşma da sürətlə davam edir. Avqustun 20-də Kəlbəcər şəhərinə ilk köç karvanı yola salındı. Kəlbəcərə səfər edən Prezident İlham Əliyev buraya köçən sakinlər ilə görüşdü. Dövlətimizin başçısının işğaldan azad edilmiş ərazilərə hər səfəri yeni bir mərhələnin başlanğıcını qoyur, yeni bir inkişaf tendensiyası başlayır. Kəlbəcər rayonunda da yeni yaşayış kompleksinin, istirahət parkının bünövrəsi qoyuldu, “Balland-Kəlbəcər balı, arı və arıçılıq məhsulları mağazası”nın açılışı edildi. Prezident, həmçinin rayona gediş-gəlişi asanlaşdıran Toğanalı-Kəlbəcər-İstisu avtomobil yolunda inşa edilmiş Murovdağ tunelinin texniki açılışını etdi. Beləliklə, Kəlbəcər rayonu da öz doğma sakinlərini qarşıladı, Kəlbəcərin Azərbaycan iqtisadiyyatına, ölkəmizin digər ərazilərinə daha yaxından inteqrasiya imkanları yarandı.
AZƏRTAC xəbər verir ki, bu barədə fikirlərini bölüşən İqtisadi İslahatların Təhlili və Kommunikasiya Mərkəzinin şöbə müdiri iqtisad elmləri doktoru Aqil Əsədov Kəlbəcərin ölkə iqtisadiyyatına nəzərəçarpacaq qədər qatqı vermək potensialına malik, təbii-iqtisadi resurslarla zəngin bir rayon olduğunu bildirib. O qeyd edib ki, rayonun qızıl, mis, civə və digər qiymətli material ehtiyatları, müalicəvi bulaqları, dağ, yaylaq, kanat, qış turizminin inkişafı üçün geniş imkanları, dərman bitkiləri, heyvandarlığın inkişafı imkanları, arıçılıq üçün münbit şərait və s. mövcuddur: “Bütün bunların məcmusu onu deməyə əsas verir ki, ilkin proqnozlara görə, Kəlbəcər iqtisadiyyatı ölkə iqtisadiyyatına, azından 2-3 faizlik töhfə vermək imkanındadır.
Qeyd edilən imkanların reallaşdırılması isə, təbii ki, zəruri infrastruktur quruculuğu və lazımi bazarlara asan çıxış ilə mümkündür. Bu baxımdan, Toğanalı-Kəlbəcər-İstisu avtomobil yolu, Murovdağ tuneli, Kəlbəcər-Laçın yolu, Laçın Beynəlxalq Hava Limanı böyük əhəmiyyət kəsb edir. İlk növbədə, bu yollar, eləcə də rayonun öz daxilində yaşayış məntəqələri arasında salınan müasir yollar inteqrasiya və bazarlara çıxış baxımından olduqca önəmlidir. 81 kilometrlik Toğanalı-Kəlbəcər-İstisu yolunun 11,6 kilometrini Murov dağının altından salınan tunel təşkil edir. Artıq işlərin yekunlaşmaq üzrə olduğu bu tunel mürəkkəb relyefə malik Kəlbəcərlə ilin bütün fəsillərində rahat əlaqə saxlamaq imkanı yaradacaq. Ümummilli Lider Heydər Əliyevin “Yol iqtisadiyyat, mədəniyyət, bir sözlə, həyat deməkdir” fikri yolların əhəmiyyətini tam mənası ilə ifadə edir. Harada yol var, orada inkişaf var, ona görə ki, yollar istehsal-satış proseslərini tamamlamağa və beləliklə, fasiləsiz fəaliyyəti təmin etməyə şərait yaradır”.
Aqil Əsədov qeyd edib ki, bu gün Kəlbəcərə Laçından, Murovdan (Ömər aşırımı), Ağdərədən, Suqovuşandan getmək mümkündür: “Yaxın zamanda Toğanalı-Murovdağ-İstisu yolu istifadəyə veriləcək ki, bu da rayonun və regionun inkişafı üçün mühüm əhəmiyyət kəsb edir. 76 kilometrlik Kəlbəcər-Laçın avtomobil yolu, yol üzərində tunellərin, yol ötürücülərinin inşası davam etdirilir. Bu yol Kəlbəcərin Laçın Beynəlxalq Hava Limanı ilə əlaqələrini intensivləşdirəcək. Gələcəkdə isə Kəlbəcərə dəmir yolunun çəkilişi nəzərdə tutulur ki, bu da regionun dəmir yolu ilə beynəlxalq nəqliyyat dəhlizlərinə çıxışına imkan yaradacaq. Əsas məqamlardan biri odur ki, uzun illər sərt relyefə malik yolların ümidinə qalmış Kəlbəcərə dəmir yolu çəkilməsinin də konseptual layihəsi hazırlanıb. Dəliməmmədli-Kəlbəcər dəmir yolu xətti əsasən sərt iqlim şəraiti ilə fərqlənən Kəlbəcər və Laçın rayonlarının turizm perspektivli ərazilərinin potensialından istifadə olunması, eləcə də sərnişinlər üçün avtomobilə alternativ nəqliyyat xidmətlərinin təqdim edilməsi baxımından xüsusi əhəmiyyət kəsb edir. Dəmir yolunun çəkilişi regionda fəaliyyət göstərəcək təsərrüfat subyektlərinin, istehsalçıların bazara çevik və asan çıxışına şərait yaratmaqla dinamik inkişafa təsir edəcək. Bütün bunlar nəinki qısa zamanda Kəlbəcərdə qaynar həyatı tam bərpa edəcək, ümumilikdə regionun inkişafına ciddi töhfə verəcək”.
Bölmənin digər xəbərləri
