Kitiya Gitendorfa: Latviyada azərbaycanlı turistləri görmək istərdik
Riqa, 14 may (AZƏRTAC). Latviya Turizm Agentlikləri və Operatorları Assosiasiyasının (ALTA) prezidenti, “Amadeus Latvija”nın direktoru Kitiya Gitendorfa apreldə Bakıda keçirilən “AİTF-2012” XI Azərbaycan Beynəlxalq turizm və səyahətlər sərgisində iştirak etmişdir. K.Gitendorfa AZƏRTAC-ın müxbiri ilə söhbətində sərgi, Azərbaycan paytaxtı və onun sakinləri haqqında təəssüratlarını bölüşmüşdür.
K.Gitendorfa demişdir: “Mən “AİTF-2012” sərgisində iştirak etmək üçün Azərbaycanın Mədəniyyət və Turizm Nazirliyindən dəvət alanda yaxşı mənada təəccübləndim və məmnun qaldım. Bu, Azərbaycana birinci səfərim idi. Təəssüratlarım unudulmazdır. İstər Şərq və Qərb elementlərinin kombinasiyası olan arxitektura, istərsə də səmimi və qonaqpərvər şəhər sakinləri adamı heyran qoyur. Təəssürat elədir ki, sanki şəhər bir yerdə dayanmır, hərəkətdədir. Burada işgüzar və mədəni həyat qaynayır”.
Sərgidə Latviyanın “AirBaltic”, “SPACE” kimi bir neçə operatoru təmsil olunmuşdur. Kitiya Gitendorfanın Bakıya daha çox tanışlıq xarakteri daşıyan səfəri Latviya və Azərbaycanın turizm sahələri arasında gələcək əməkdaşlığı yoluna qoymaq, ölkənin turizm potensialını öyrənmək məqsədi daşıyırdı. K.Gitendorfa demişdir: “Biz Latviyada azərbaycanlı turistləri də görmək istərdik. Axı, Latviyada istirahət turistləri, xüsusən, yay vaxtlarında cəlb edən Riqa sahili, əcaib qumsallıqları olan çimərliklər, mavi göllər deməkdir. Bu, çoxəsrlik tarixə, orijinal arxitekturaya və rəngarəng mədəni həyata malik olan Avropa ölkəsinə səyahətdir.
Bu günlərdə Riqada Latviya və Azərbaycan işəgötürənlər konfederasiyaları nümayəndələrinin görüşü olmuşdur. Görüşdə əməkdaşlıq haqqında protokol imzalanmış, həmçinin iki ölkə arasında birbaşa aviareysin açılması məsələsi müzakirə edilmişdir. ALTA-nın prezidenti demişdir: “Heç şübhəsiz, turizmin inkişafına ilk növbədə birbaşa aviareys kömək edə bilər”.
“Amadeus Latvija”nın direktoru Kitiya Gitendorfa başçılıq etdiyi qurumun fəaliyyətindən danışaraq demişdir: “Biz 20 illiyimizi bayram etdik, Latviyada yeganə peşəkar turizm təşkilatıyıq”. Assosiasiyanın tərkibinə 60-dan çox turizm şirkəti daxildir. Məqsədimiz ölkədə turizmin sahə bazarı kimi inkişafına nail olmaq, turizm sahəsində orijinal və maraqlı əməkdaşlıq formaları təklif etmək, turistləri yüksək səviyyəli xidmətlə təmin etməkdir.
Nigar Hüseynova
AZƏRTAC-ın xüsusi müxbiri
Riqa
Bölmənin digər xəbərləri
