KOBİA: Dayanıqlı maliyyə sistemlərinin yaradılmasında rəqəmsal alətlərin rolu artmaqdadır
Bakı, 24 iyun, AZƏRTAC
Bu gün rəqəmsal texnologiyaların tətbiqi, süni intellektin, blokçeyn həllərinin və rəqəmsal bankçılığın inkişafı ənənəvi maliyyə sistemlərinin strukturlarını əsaslı şəkildə dəyişməkdədir. Elektron hökumət, rəqəmsal bankçılıq və süni intellekt əsaslı xidmətlər artıq hər bir kəsin gündəlik həyatının ayrılmaz hissəsinə çevrilməkdədir.
AZƏRTAC xəbər verir ki, bu sözləri Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov Azərbaycan Banklar Assosiasiyası və Azərbaycan Respublikasının Mərkəzi Bankının təşkilatçılığı ilə keçirilən "Fintex sammit 2025 - Maliyyə Texnologiyalar Sərgisi”ndə çıxışı zamanı deyib.
O bildirib ki, hər bir transformasiya prosesi kimi maliyyə texnologiyaları sahəsində də həm böyük imkanlar, həm də ciddi çağırışlar mövcuddur.
“Bu çağırışlar və trendlər yalnız texnoloji deyil, həm də iqtisadi, sosial və hüquqi aspektlərdən qiymətləndirilməlidir. Bu sahədə ən vacib çağırışlardan biri rəqəmsal təhlükəsizlik məsələsidir. Etimadının qorunması üçün informasiya təhlükəsizliyinin təmin edilməsi, rəqəmsal identifikasiya sistemlərinin təkmilləşdirilməsi zəruridir. Bununla yanaşı, tənzimləyici çərçivənin çevikliyi də aktual məsələdir. Finteks texnologiyaları ənənəvi bank sistemlərindən fərqli olaraq daha dinamik və yenilikçidir. Bu isə normativ-hüquqi bazanın mütərəqqi və proaktiv olmasını tələb edir. Bir tərəfdən innovasiyalara geniş meydan verilməli, digər tərəfdən isə maliyyə dayanıqlılığı və istehlakçı hüquqları qorunmalıdır”, - deyə Orxan Məmmədov vurğulayıb.
KOBİA sədrinin sözlərinə görə, əhəmiyyətli trendlərdən biri də maliyyə inklüzivliyinin artırılmasıdır: “Rəqəmsal texnologiyalar vasitəsilə maliyyə xidmətlərinə çıxışı olmayan mikro və kiçik sahibkarların sistemə inteqrasiyası vacibdir. Lakin bu, eyni zamanda, rəqəmsal savadlılıq səviyyəsinin artırılmasını da tələb edir. Bundan başqa, ekoloji, sosial və idarəetmə (ESG) prinsiplərinin finteks sektoruna inteqrasiyası da yeni bir tendensiyadır. Yaşıl finteks anlayışı artıq formalaşmağa başlayıb və dayanıqlı maliyyə sistemlərinin yaradılmasında rəqəmsal alətlərin rolu artmaqdadır. Bu isə texnologiyanın təkcə iqtisadi deyil, həm də ekoloji və sosial fayda üçün istifadə olunmasının vacibliyini ön plana çıxarır. Ölkəmizdə də bu sahədə mühüm addımlar atılmaqdadır”.
Bölmənin digər xəbərləri
