KÖLNDƏ ALMAN-AZƏRBAYCAN ALİ MƏKTƏB GÜNÜ KEÇİRİLƏCƏKDİR
AZƏRTAC xəbər verir ki, oktyabrın 9-da Almaniyanın Köln şəhərində Alman-Azərbaycan ali məktəb günü keçiriləcəkdir.
Tədbirdən məqsəd Almaniya və Azərbaycan ali məktəbləri arasında əməkdaşlığın daha da genişləndirilməsi imkanlarını araşdırmaq, təcrubə mübadiləsi aparmaqdır.
Xarici Ölkələrdə Yaşayan Azərbaycanlılarla İş üzrə Dövlət Komitəsindən bildirmişlər ki, ali məktəb günü Avropa İttifaqının təhsillə bağlı layihəsi çərçivəsində təşkil olunacaqdır. Hazırda Köln Tətbiqi Elmlər Universiteti Niderlandın Heerlen Tətbiqi Elmlər Universiteti ilə birlikdə Azərbaycan Texniki Universiteti, Azərbaycan Dövlət Neft Akademiyası, Azərbaycan Memarlıq və İnşaat Universiteti, Sumqayıt Dövlət Universiteti və Mingəçevir Politexnik İnstitutu ilə əməkdaşlıq edir. Layihənin məqsədi təhsilin yeniləşdirilməsi, “Avtomatlaşdırma və informasiya texnologiyaları”, “Elektroenergetika”, “Ətraf mühitin mühafizəsi texnikası”, “Enerji menecmenti” ixtisasları üzrə yeni bakalavr və magistr tədris proqramlarını həyata keçirməkdir.
Ali məktəb günündə Azərbaycanın Almaniyadakı səfiri Pərviz Şahbazov, Azərbaycan-Almaniya Forumunun sədri Otto Hauzer, Bundestaqda Cənubi Qafqaz üzrə parlament qrupunun sədri Steffen Raiçhe iştirak edəcəklər. Tədbirə Azərbaycanın təhsil naziri Misir Mərdanov da dəvət edilmişdir. Onun “Azərbaycan və Boloniya prosesi” mövzusunda məruzə edəcəyi nəzərdə tutulur.
Bölmənin digər xəbərləri
