Korrupsiya qalmaqalı ilə çalxalanan Avropa Parlamentinin “ədalət” axtarışı
Bakı, 15 mart, AZƏRTAC
Azərbaycana qarşı qərəzli mövqe sərgiləyən Avropa Parlamentinin yaxın tarıxinə baxsaq, bu qurumun korrupsiya mənbəyi olması haqqında dolaşan söhbətlər təsdiqini tapmaqla yanaşı, onun həqiqi siması da üzə çıxır. Azərbaycanın guya demokratik ölkə olmadığını iddia edən və ölkəmizə qarşı qərəzli sənəd qəbul etməyə hazırlaşan Avropa Parlamentinin sədr müavini xanım Eva Kayli hazırda istintaq altındadır.
AZƏRTAC xəbər verir ki, ötən ilin dekabrında polisin həyata keçirdiyi əməliyyat nəticəsində Eva Kayli rüşvət və korrupsiya ittihamı ilə həbs edilib. Belçikada nəşr olunan “Le Soir” qəzeti yazır ki, korrupsiya şəbəkəsi quran Eva Kayli bu işə vətəndaş sevgilisi Françesko Corcia və atası Pyer Antonio Panserini də qatıb. O və F.Corcia əvvəlcə “Ədalətsiz sülh olmaz” adlı qeyri-hökumət təşkilatı yaradaraq guya hüquq müdafiəsi ilə məşğul olmağa başlayıblar. Lakin bu təşkilatın əsas işi müxtəlif dövlətlərdən pul alıb E.Kayliyə ötürmək və bu pulun müqabilində həmin dövlətlərin maraqlarını müdafiə edən qərarların Avropa Parlamentində çıxarılmasına nail olmaqdan ibarət idi. Sevgililərin yaratdığı təşkilatın adında “ədalət” sözünün olması da düşünmək üçün əsas verir. Məgər, Avropada ədalət və sülh yoxdur ki, bu iki sevgili böyük demokratiya tarixinə malik olan bir qitədə ədalətli sülh axtarmağa başlayıblar? Bu düşüncədən çıxan nəticə ondan ibarətdir ki, məqsəd sülh və ədalət deyil, bu ad altında rüşvət toplamaqdır.
Polisin apardığı axtarışlar zamanı Eva Kaylinin evindən 600 min avro, iş otağından isə 20 min avroya yaxın nəğd pul tapılıb. Təbii ki, nə E.Kayli, nə onun sevgilisi, nə də İtaliya ərazisində alınan rüşvəti çantada Belçikaya daşıya atası Panseri bu pulların mənbəyini izah edə bilməyiblər. Bunlar polis tərəfindən aşkara çıxarılan işlərdir. İctimaiyyətə məlum olmayan belə “ədalət axtarışı” yəqin ki, çox olub.
Yunanıstanda nəşr olunan “To Pontiki” qəzeti yazır ki, Panseri hələ 2019-cu ildə “Fight Impunity” adlı qeyri-hökumət təşkilatı yaratmışdı. Əlbəttə, bu dövr onun qızının siyasi fəaliyyətin aktiv dövrü idi. E.Kayli Avropa Parlamentinin sədr müavini seçilmişdi və siyasi nüfuza malik idi. “Fight Impunity” təşkilatına heç də sadə adamlar cəlb olunmadı. “Hüquq müdafiəsi” adı altında fəaliyyət göstərən təşkilata Avropanın tanınmış simaları - Avropa Parlamentinin keçmiş rəhbəri Federika Moqerini, Fransanın keçmiş iqtisadiyyat naziri Bernar Kaznev, Avropa Parlamentinin keçmiş komissarı Dmitros Avramopuls və başqaları daxil idilər. İlk baxışdan pis düşünülməyib. Axı nüfuzu olmayan adama heç kim inanmaz və etibar etməz. Bu kimi nüfuzlu adamların adından sui-istifadə də öz bəhrəsini verdi və Avropa Parlamenti rəsmisi korrupsiya planlarını həyata keçirdi.
İndi belə bir təşkilatın Azərbaycana qarşı qərəzli mövqeyini izah etməyə ehtiyac qalmır. Lakin Avropa Parlamentinin ədalətindən fərqli olaraq, ədalət naminə demək lazımdır ki, bu kimi qalmaqala cəlb olunan qurum ədalətli qərar verə bilərmi? Cavab birmənalidir. Əlbəttə, yox. Avropada fəaliyyət göstərən erməni lobbisi, regionda marağı olan bəzi dövlətlərin mövqeyi, bu gün Avropada baş qaldıran islamofobiya və digər amillər Azərbaycan qarşı qərəzli mövqeyi şərtləndirir. Əlbəttə ki, müəyyən “qonorar” müqabilində qəbul edilən belə qərəzli qətnamələr Azərbaycanı müstəqil siyasətindən döndərə bilməz. Lakin Avropa strukturları və siyasi xadimlərinin heç də hamısı qarşılıqlı faydalı əməkdaşlıq əlaqələrini lobbiçilik maraqlarına qurban vermirlər.
Bu gün Avropanın Azərbaycana indiyədək heç vaxt olmadığı qədər ehtiyacı var. Enerji böhranı yaşayan qitə Azərbaycanın təbii qazından enerji təhlükəsizliyini təmin etmək üçün yararlanmaq istəyir. Bu təhlükəsizliyin təmin edilməsi üçün böyük potensiala və imkana malik Azərbaycan hər dəfə olduğu kimi etibarlı tərəfdaş olduğunu nümayiş etdirir. Təsadüfi deyil ki, 2022-ci ilin iyulunda Avropa Komissiyasının rəhbəri Ursula Fon der Lyayen Bakıya səfər edərək Azərbaycan ilə Avropa ittifaqı arasında strateji tərəfdaşlığa dair Anlaşma Memorandumunu imzaladı.
Avropa İttifaqı ilə Azərbaycan arasında strateji tərəfdaşlıq Xəzər dənizində hasil olunan təbii qazın Avropa İttifaqına və Qərbi Balkan ölkələrinə tədarükünü nəzərdə tutur. Azərbaycan 2027-ci ilə qədər hər il ən Avropaya 20 milyard kubmetr həcmində təbii qaz ixrac edəcəyi öhdəliyini götürüb. Azərbaycan bu həcmdə qazı Cənub Qaz Dəhlizi vasitəsilə Avropaya çox asanlıqla ixrac edəcək və Avropa dövlətlərinin enerji böhranından çıxmasına əsaslı yardım göstərəcək. Bu məsələdə Avropa Azərbaycandan daha çox maraqlıdır və tərəfdaşlıq öhdəliyini layiqincə yerinə yetirməyə hazırdır.
Azərbaycan qazının TAP kəməri ilə İtaliya, Yunanıstana və Bolqarıstana tədarükü 2020-ci il dekabrın 31-dən başlayıb. 2021-ci ildə Azərbaycan Avropaya 8,2 milyard kubmetr, 2022-ci ilin birinci rübündə isə 2,6 milyard kubmetr qaz ixrac edib. Ötən ildə Avropaya qaz ixracı 10 milyard kubmetrdən çox olub. Bütün bunlar Azərbaycan ilə Avropanın xoşməramlı münasibətlərindən xəbər verir və bunlar real həyatımızın təzahürüdür. Lobbi təşkilatlarının təsiri ilə Azərbaycana qarşı qərəzli qərarlar isə sadəcə olaraq “qonorar” naminə görülən işlərdir. Bu kimi qətnamələrin hüquqi əsası olmadığı kimi, mənəvi və dəyəri də olmur.
Bölmənin digər xəbərləri
