KÜLLİ MİQDARDA VERGİDƏN YAYINAN VƏ SAXTA SƏNƏDLƏR TƏQDİM EDƏN “BİZNESMEN” SAXLANILMIŞDIR
Yanvarın 31-də mətbuat işçilərinə məlumat verən Vergilər Nazirliyinin vergi yoxlamaları və Vergi cinayətlərinin ibtidai araşdırması Departamentinin istintaq şöbəsinin rəis müavini Qurban Mehrəliyev vurğuladı ki, həmin fiziki və hüquqi şəxslər real olaraq heç bir alqı-satqı əməliyyatları aparmadan, iş-xidmət göstərmədən ayrı-ayrı müəssisə və təşkilatlara satış dövriyyəsinin müəyyən faizi müqabilində ciddi uçot sənədləri olan qaimə-faktura, vergi hesab fakturası, kassa-mədaxil orderləri satmaqla məşğul olmuşlar. Nəticədə bu yalançı biznesmenlər cüzi miqdarda pul əldə etmiş, dövlət büdcəsinə isə külli miqdarda ziyan vurmuşlar.
Belə ki, onlar aparmadıqları əməliyyat barədə hər hansı bir təşkilata saxta sənəd təqdim edərək, guya həmin təşkilatdan sənəddə göstərilən dövriyyənin 18 faiz dərəcəsi ilə dövlət büdcəsinə çatmalı olan əlavə dəyər vergisinin də aldıqlarını göstərmişlər. Onlar bu ƏDV “karuseli”ni davam etdirərək, guya əvvəlki təşkilata satdıqları malı, öz növbələrində, başqa firmadan aldıqları və alqı-satqı zamanı alıcıya ƏDV ödədikləri barədə saxta sənədlər almışlar. Həmin proses bir neçə dəfə davam etdirilir. Son nəticədə isə külli miqdarda ƏDV dövlət büdcəsinə ödəməkdən yayındırılmışdır.
Bu günlərdə istintaq şöbəsinin apardığı əməliyyat-istintaq tədbirləri nəticəsində “Nizami-2”, “Günəş”, “Baba”, “Rəhman”, “ Mehdi”, “A.M. Y.Ə”, “Uğur” firmalarının fəaliyyətinə faktiki rəhbərlik etməklə bu firmaların bəzilərində direktor kimi rəsmiləşdirilmiş Qasımov Qulu Qasım oğlunun ofisində axtarış keçirilmiş və çoxlu sayda firma və müəssisələrin möhür və ştampları, müxtəlif firmalara məxsus olan ciddi uçot səndləri aşkar edilərək götürülmüşdür.
İlkin araşdırmalarla Q.Qasımovun 5,1 milyard manat məbləğində vergiləri ödəməkdən yayındırdığı və müxtəlif firma və müəssisələrə 184 milyard manatdan artıq məbləğdə ciddi uçot sənədləri satmaqla saxta sənədləşmələr apardığı müəyyən edilmişdir.
Q.Qasımov Azərbaycan Respublikası CM-nin 213.4, 313,320.1 və 320.2-ci maddələri ilə təqsirləndirilən şəxs qismində cəlb olunmuş, Bakı şəhəri Xətai rayon məhkəməsinin 2004-cü il 30 yanvar tarixli qərarı ilə barəsində həbsəalma qətimkan tədbiri seçilmişdir. İş üzrə istintaq davam etdirilir.
Bölmənin digər xəbərləri
