Kür və Araz transsərhəd çaylarında keçirilən monitorinqin nəticələri açıqlanmışdır
Bakı, 3 fevral (AZƏRTAC). Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamenti Kür və Araz transsərhəd çaylarında yanvar ayının üçüncü ongünlüyü üçün keçirdiyi monitorinqin nəticələrini açıqlamışdır.
Nazirliyin mətbuat xidmətindən AZƏRTAC-a bildirmişlər ki, monitorinqin nəticələrinə əsasən, Gürcüstan və Ermənistan ərazilərindən təmizlənmədən axıdılan məişət tullantıları və sənaye müəssisələrinin çirkab sularının təsiri nəticəsində Kür çayı və onun qollarında biogen maddələrin miqdarı normadan dəfələrlə artıq olmuşdur.
Məlum olmuşdur ki, suyun tərkibindəki spesifik çirkləndiricilərdən fenollar Şıxlı-2 məntəqəsində 4, Ağstafaçay su anbarında 4.5, Ağstafaçayda isə 5 dəfə yol verilən qatılıq həddini keçmişdir.
Araz çayının Horadiz, Birinci Şahsevən və Bəhramtəpə məntəqələrində də fenolların yol verilən qatılıq həddini keçdiyi müşahidə olunmuşdur.
Kür və Araz çayları üzrə bütün məntəqələrdə mis birləşmələri norma daxilində tərəddüd etmişdir.
Suyun oksigen rejiminin isə bütün məntəqələrdə sanitar norma daxilində dəyişdiyi müəyyən edilmişdir.
Bölmənin digər xəbərləri
