KÜRDƏ SUYUN SƏVİYYƏSİ 50 SANTİMETR AŞAĞI DÜŞMÜŞDÜR
Bakı, 10 may (AZƏRTAC). Kürün daşması nəticəsində baş vermiş təbii fəlakətlə bağlı Sabirabad rayonunun ərazisində əhalinin köçürülməsi və bəndçəkmə işləri davam etdirilir.
Aldığımız son məlumata görə, artıq əsas bəndin 170 metrlik hissəsi yenidən qurulmuş və çayda suyun səviyyəsi isə xeyli aşağı düşmüşdür. Hazırda aidiyyəti qurumlar fasiləsiz olaraq təhlükəsizlik tədbirlərini davam etdirirlər.
Sabirabad ilə Şirvan şəhəri arasında yerləşən Bayramlı qəsəbəsində 170 metrə yaxın bənd bərpa edilmişdir. Suyun səviyyəsi isə bu ərazilərdə iki gün ərzində 50 santimetr azalmışdır.
Çayda suyun səviyyəsinin qalxması nəticəsində uçan 83 metrlik iki bəndin bərpası istiqamətində tədbirlər davam etdirilir. Artıq ikinci bəndin qurulması da başa çatdırılmışdır. Bundan əlavə, subasma ehtimalı olan kəndlərdə və təhlükəli ərazilərdə yaşayan əhalinin köçürülməsi işləri də həyata keçirilir. Kür çayının yaxınlığında yerləşən 9 kənd tamamilə boşaldılmışdır.
Bu kəndlərin əhalisi təhlükəsiz yerlərə köçürülmüşdür. Şirvan şəhəri və Sabirabad rayonunda qurulan çadır şəhərciyində yerləşdirilən insanların qida, içməli su, tibbi xidmət təminatı, elektrik enerjisi ilə təchizat məsələləri də həll olunmuşdur. Fövqəladə Hallar, Daxili İşlər, Nəqliyyat və Səhiyyə nazirliklərinin eləcə də, “Meliorasiya və Su Təsərrüfatı” Açıq Səhmdar Cəmiyyətinin əməkdaşlarının briqadaları fəlakət bölgəsində fasiləsiz olaraq fəaliyyət göstərirlər.
Fövqəladə hallar naziri Kəmaləddin Heydərov təbii fəlakət zonasında vəziyyətin normallaşmağa doğru getdiyini bildirmişdir. O demişdir ki, bəndbərkitmə məsafəsi artıq qısalmışdır. Suyun qalxması müşahidə olunmur, hətta bəzi yerlərdə 50-80 santimetrə, 1 metrə qədər azalmalar vardır. Yəni böhran vəziyyəti geridə qalmışdır. Köçürülmüş 9 kəndin əhalisinin vəziyyəti normaldır. Hazırda ərazidə bəndbərkitmə işləri ilə məşğuluq. Yaxın 2-3 gün ərzində bənd tamamilə bərpa olunacaq.
Səhiyyə naziri Oqtay Şirəliyev isə fəlakət zonasına lazımi dava-dərmanların göndərildiyini, Bakıdan əraziyə həkim briqadasının ezam olunduğunu söyləmişdir. Daxili İşlər Nazirliyinin bölgəyə səfərbər olunan şəxsi heyəti isə əhalisi köçürülən kəndlərdə vətəndaşların əmlakını və çadır şəhərciklərinə müvəqqəti yerləşdirilən insanların təhlükəsizliyini təmin edir. Təhlükənin qismən aradan qaldırılmasına baxmayaraq, ərazidə bəndbərkitmə işləri dayandırılmır və hətta gecə saatlarında da davam etdirilir. Əraziyə iri qaya parçaları, böyük daşlar və beton hissələri gətirilmişdir. Hazırda əraziyə Nəqliyyat Nazirliyinin 100-ə yaxın yük maşını, 400-ə qədər ekskavator və 500-dən artıq canlı qüvvəsi səfərbər olunmuşdur.
Nəqliyyat naziri Ziya Məmmədov demişdir ki, hazırda daşqınların daha çox fəsad verməməsi üçün Şirvan-Osmanlı-Astara istiqamətində dəmir yolunun bir hissəsinin yarılması, suyun bir tərəfdən digər tərəfə ötürülməsinin təmin edilməsi barədə qərar qəbul olunmuşdur.
Nazir onu da əlavə etmişdir ki, təbii fəlakətlə əlaqədar Astara istiqamətində gedən qatarlara, o cümlədən yük və sərnişin qatarlarının hərəkətinə müvəqqəti məhdudiyyət qoyulacaqdır.
Aidiyyəti orqanlarla yanaşı, bəndbərkitmə işlərinə kənd sakinləri də qoşulmuşlar. Onlar bu çətin anda mənəvi və maddi dəstək aldıqları üçün Prezident İlham Əliyevə minnətdarlıqlarını bildirmişlər. Dövlətimizin başçısı İlham Əliyevin qarşıya qoyduğu məsələlər təbii fəlakət baş verdiyi ərazilərdə sürətlə həyata keçirilir. Kürdə suyun kəskin şəkildə qalxması ilə əlaqədar təhlükəsizlik tədbirləri gücləndirilir, təbii fəlakətdən ziyan çəkən əhaliyə kömək göstərilir, ehtiyacı olanlar müvəqqəti yerlərdə məskunlaşdırılır.
Hazırda Biləsuvar və Salyan rayonlarında da qabaqlayıcı tədbirlər həyata keçirilir.
Bölmənin digər xəbərləri
