Laçında fırçaların dili ilə danışan əsərlər – REPORTAJ
Laçın, 5 iyun, Gülay Nəzərova, AZƏRTAC
Qarabağın, Şərqi Zəngəzurun dağları təkcə daşlardan, qayalardan, torpaqdan ibarət deyil – hər biri yaddaş daşıyır, hekayə söyləyir, nəfəs alır. Laçının yamyaşıl yamacları, Günəş işığında bərq vuran çiçəkləri, küləklə pıçıldaşan çinarları çoxlarına ilham verdiyi kimi, rəssamların fırçasında da yeni həyat tapır.
MDB-nin mədəniyyət paytaxtı elan olunan Laçın şəhərində bu günlərdə təşkil edilən “Birlik rəngləri” sərgisi də məhz bu ruhun ifadəsinə çevrildi.
AZƏRTAC-ın bölgəyə ezam olunan müxbiri sərgidə iştirak edən rəssamlarla söhbət edib, onların qartal oylağı olan Laçınla bağlı əsərlərindəki duyğularını, hisslərini elə özlərindən dinləyib.
Belə rəssamlardan biri Mir Azər Abdullayevdir. O, işlədiyi əsərdə Laçınla bağlı duyğularını fırça ilə əks etdirdiyini bildirib: “Hər bir əsərə başlamazdan əvvəl artıq müəyyən vizual və kreativ yanaşmalar formalaşır. Əsərlərimin demək olar ki, hər biri Laçına, ümumilikdə, Şərqi Zəngəzura, Qarabağa həsr olunub. Bu torpaqlar insana təkcə ilham vermir, həm də sanki onu səsləyir,” – deyə rəssam vurğulayıb.
Mir Azər Abdullayevin əl işlərində xüsusilə at və onun daşıdığı mənalar ön plana çıxır. Eyni zamanda, qədim şəhərlərin memarlıq üslubu, xalça ornamentləri, quş təsvirləri, eləcə də bu torpaqların mədəniyyətinə məxsus müxtəlif detallar rəssamın sənət dünyasının ayrılmaz hissəsidir. Bu elementlərlə o, özünəməxsus əsərlər yaradır. Onun bu silsilədən ilk işi “Qarabağa xoş gəlmisiniz” əsəridir. “Sakit arzular” və “Bakıdan hədiyyə” kimi əsərləri də həmin emosional və vizual xəttin davamıdır.
Sərginin digər iştirakçısı Əməkdar rəssam, Rəssamlar İttifaqının üzvü Vüqar Əli isə Şərqi Zəngəzurun, Qarabağın həm də mənəvi varlığını əsərlərinə köçürməyə çalışdığını deyib.
“MDB ölkələrinin bir neçə rəssamı ilə birlikdə möhtəşəm layihə həyata keçirdik. Bu yerlərin təbiəti, tarixi, abidələri və memarlığı rəssam üçün əsl xəzinədir. Mənim ilk işim “Sevgi dastanı” adlanır. Digər iki əsər isə Şuşa mövzusuna həsr olunub. Stilizə olunmuş simvollar, Qarabağ xalçalarına xas naxışlar, simvolik quş fiqurları və tarixi-memarlıq abidələri əsərlərimin əsas xəttini təşkil edir”, - deyə rəssam diqqətə çatdırıb.
Bu sərgi sadəcə rəsm əsərlərinin nümayişi deyil, həm də bir çağırışdır – Qarabağın tarixini, ruhunu, təbiətini və mədəniyyətini unutmamaq, onu yaşatmaq və yeni nəsillərə ötürmək çağırışı. Sərgidə nümayiş olunan hər bir rəsm sanki bir şeirdir, rənglərin dili ilə yazılmış xatirə kitabıdır.
Əsərlərdəki hər fırça izi, hər rəng tonu keçmişlə bu gün arasında körpü yaradır. Rəssamların qəlbindən süzülüb gələn bu rəngli dünya təkcə göz oxşamır, həm də insanların duyğularına toxunur, yaddaşı oyadır.
İşğaldan azad olunan torpaqlara həyat yenidən qayıdır. Bu, təkcə binaların inşasında, infrastrukturun yaradılmasında deyil – həm də sənətdə, musiqidə, ədəbiyyatda, rənglərdə, fırça izlərində hiss olunur. Bu həyatın rənglərində Qarabağın övladlarının sevgisi, zəhməti, sədaqəti və sənətkarlığı var.
Bir sözlə, artıq Laçın təkcə mədəniyyətin deyil, həm də azad ruhun paytaxtına çevrilir. Bu torpaq yalnız keçmişi deyil, gələcəyi də rəngləndirir - işıqlarla, ümidlərlə...
Bölmənin digər xəbərləri
