Latviya NATO-da daha güclü kollektiv müdafiə sistemi qurmağa çağırır
Bakı, 3 iyun, AZƏRTAC
NATO müttəfiqləri gələn ay Türkiyədə toplanmağa hazırlaşırlar. Bu ərəfədə Latviya Alyans daxilində konsolidasiya müraciəti ilə çıxış edib.
AZƏRTAC xarici mediaya istinadla xəbər verir ki, Rusiya və Belarusla həmsərhəd olan Baltikyanı ölkə 2027-ci ildən etibarən ÜDM-in azı 5 faizini müdafiəyə xərcləməyi qanuni olaraq öhdəsinə götürən NATO-nun ilk üzvü olub.
Latviyanın xarici işlər naziri Bayba Braje 7-8 iyul tarixlərində Ankarada keçiriləcək NATO sammitindən əvvəl Anadolu agentliyinə açıqlamasında bildirib: “Bu gün “ön cəbhə” və “arxa cəbhə” müttəfiqləri yoxdur - hamımız NATO-nun ön cəbhəsində yer alırıq”.
Braje bildirib ki, müttəfiqlər razılaşdırılmış müdafiə investisiya hədəflərinə doğru konkret irəliləyiş göstərməli, öhdəlikləri yerinə yetirməli və müdafiə sənayesi potensialını gücləndirməlidirlər.
Onun sözlərinə görə, qlobal qeyri-müəyyənlik fonunda Latviyanın prioritetləri aydın olaraq qalır: “Latviyanın mesajı çox sadədir: NATO-nun əsas missiyası kollektiv müdafiə olaraq qalır və Alyans bugünkü təhlükəsizlik mühitinə uyğun olaraq çəkindirmə və müdafiə mövqeyini gücləndirməyə davam etməlidir”.
O, Alyansın üzləşdiyi təhdidlərin Ukraynadakı müharibədən tutmuş Avro-Atlantik təhlükəsizliyinə təsir edən daha geniş çağırışlara qədər bir-biri ilə əlaqəli olduğunu iddia edib. “Təhlükəsizlik yalnız bəyanatlar üzərində qurula bilməz; bunun üçün güclü silahlı qüvvələr, möhkəm təchizat zəncirləri, qabaqcıl texnologiyalar və davamlı siyasi qətiyyət tələb olunur”, - deyə Latviyanın naziri əlavə edib.
Braje hava hücumundan müdafiə sistemlərinə, dron texnologiyalarına və hərbi infrastrukturuna investisiyalara, eləcə də Latviyanın NATO qoşunlarına ev sahibliyi etməkdə və Alyansın əməliyyatlarına töhfə verməkdəki roluna diqqət çəkib.
Nazir, həmçinin Türkiyənin NATO-nun şərq cinahına verdiyi töhfəni və bu ilin sonunda Estoniyanın Amari hava bazasından Baltik Hava Polisi missiyalarında planlaşdırılan iştirakını yüksək qiymətləndirib.
Bölmənin digər xəbərləri
