Latviya Seyminin deputatı rus dilini müdafiə etdiyinə görə iclasdan qovulub
Bakı, 5 iyun, AZƏRTAC
Latviya Seymi (parlamenti) rus dilini dəstəkləyən sözlərinə görə “Sabitlik” partiyasının lideri Aleksey Roslikovu iclas salonundan kənarlaşdırıb.
AZƏRTAC xəbər verir ki, bu barədə Latviyanın LSM portalı məlumat yayıb.
Parlamentdə sovet dövründə Latviyada həyata keçirilən ruslaşdırma siyasətinin “linqvistik nəticələrinin aradan qaldırılması haqqında” bəyannamənin müzakirəsi zamanı deputat rus dilində bu sözləri deyib: “Rus dili bizim dilimizdir!”. O, həmçinin qətnamə layihəsinin gündəliyə salınmasının əleyhinə çıxaraq Latviya əhalisinin xeyli hissəsini hər gün evdə rus dilində danışan rusların təşkil etdiyini və onlarsız ölkənin inkişaf edə bilməyəcəyini söyləyib.
Portalın yazdığına görə, “Seymin sessiyasında rus dilindən istifadə etdiyinə, parlamentə və deputatlara hörmətsizlik göstərdiyinə görə” Roslikovun iclas zalından çıxarılması üçün səsvermə keçirilib. Qərar 63 deputat tərəfindən dəstəklənib.
Mayın sonunda Latviya Seymi xidməti binalarda yalnız latış dilindən istifadəni məcbur edən reqlament düzəlişlərini təsdiqləyib. Beləliklə, parlament binasında da başqa dillərdən istifadə “qanun pozuntusu” kimi qiymətləndiriləcək.
Latviyanın rəsmi statistika portalının 2023-cü ilin oktyabrında dərc edilmiş məlumatına görə, 18-69 yaşlı Latviya sakinlərinin 37,7 faizi rus dilini ana dili adlandırıb.
Bölmənin digər xəbərləri
