Leman gölü üzərində təyyarələrin təhlükə ilə üzləşməsinin səbəbləri araşdırılır
Cenevrə, 21 avqust, AZƏRTAC
“Aegean Airlines” aviaşirkətinə məxsus “Airbus A320neo” təyyarəsinin 2024-cü ilin noyabrında Leman gölü üzərində qəza təhlükəsi ilə üzləşməsinin səbəblərinə dair araşdırma başlanıb.
AZƏRTAC “La Tribune de Geneve” qəzetinə istinadla xəbər verir ki, Afinadan qalxaraq Cenevrə-Cointrin hava limanına enməyə hazırlaşan təyyarə suyun səthinə 80 metr yaxın olub. Təyyarə avtomatik təhlükə xəbərdarlığı sisteminin siqnalı ilə pilotların mühərrik gücünü artırması nəticəsində yenidən yüksəkliyə qaldırılıb və qəza baş verməyib.
Vurğulanır ki, hadisə zamanı hava şəraiti normal, görmə imkanları qənaətbəxş olub. Belə şəraitdə təyyarə həmin vaxt 300 metr yüksəklikdə olmalı idi.
Qeyd edək ki, bu, Leman gölü üzərində baş verən ilk belə hadisə deyil. 2023-cü ilin noyabr ayında da oxşar hal qeydə alınıb.
Mütəxəssislər bildiriblər ki, qısa müddətdə eyni ərazidə iki oxşar hadisənin qeydə alınması ciddi suallar doğurur. Ona görə də, bu məsələnin ciddi şəkildə nəzərdən keçirilməsi və müvafiq tədbirlərin görülməsi planlaşdırılıb.
Bölmənin digər xəbərləri
