Lənkəran-Astara bölgəsi çaylarında sululuğun kəskin artımı qeydə alınıb
Bakı, 5 oktyabr, AZƏRTAC
Son zamanlar yağan intensiv yağışlar nəticəsində respublikanın əksər bölgələrində çaylarda suyun səviyyəsində artım qeydə alınıb. Xüsusilə Lənkəran-Astara bölgəsi çaylarında kəskin artım müşahidə olunub. Lənkərançay çayında suyun səviyyəsi 1 metr 50 santimetr, Viləşçayda 57 santimetr artıb. Nəticədə həmin çaylarda sel və daşqınlar yaranıb. Ən çox artım isə oktyabrın 4-ü axşam qeydə alınıb.
Bu barədə AZƏRTAC-a Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosunun baş hidroloqu Asif Verdiyev məlumat verib.
A.Verdiyev bildirib ki, oktyabrın 5-dən başlayaraq artıq çaylarda suyun səviyyəsi azalıb. Növbəti günlər ərzində də azalma müşahidə ediləcəyi ehtimalı var.
Baş hidroloq cənub bölgəsində yağan intensiv yağışların və çaylarda sululuğun artımının payız fəsli üçün xarakterik olduğunu da qeyd edib.
Bölmənin digər xəbərləri
