Lerikdə Milli Qəhrəman Valeh Müslümovun xatirəsinə həsr olunmuş anma mərasimi keçirilmişdir
Lerik, 10 aprel (AZƏRTAC). Aprelin 10-da Lerik şəhərində Azərbaycanın Milli Qəhrəmanı Valeh Müslümovun xatirəsinə həsr olunmuş anma mərasimi keçirilmişdir.
AZƏRTAC xəbər verir ki, tədbir iştirakçıları əvvəlcə qəhrəmanın abidəsi önünə gül dəstələri düzərək xatirəsini ehtiramla yad etmişlər.
Mərasimdə Lerik Rayon İcra Hakimiyyəti başçısı aparatının ictimai təşkilatlar və siyasi partiyalarla iş şöbəsinin müdiri Əlipənah Bayramov bildirmişdir ki, Azərbaycanın ilk Milli qəhrəmanlarından olan Valeh Müslümovun şəhid olmasından 20 il ötür.
Valeh Əlizahid oğlu Müslümov 1968-ci il sentyabrın 2-də Lerik şəhərində anadan olmuşdur. 1983-cü ildə Lerik şəhər 2 nömrəli orta məktəbinin səkkizinci sinfini bitirən V.Müslümov Sumqayıt şəhər 17 nömrəli peşə məktəbinə daxil olmuşdur. O, burada təhsil aldığı zaman həm də idmanla məşğul olmuşdur. Əmək fəaliyyətinə tikinti trestində başlamışdır. 1986-1988-ci illərdə ordu sıralarında xidmət etmişdir.
1991-ci ilin avqust ayında Azərbaycan Respublikası Daxili İşlər Nazirliyinin Xüsusi Təyinatlı Milis Dəstəsində xidmətə başlamışdır.
V.Müslümov Şuşa, Xocalı, Tovuz, Füzuli, Qubadlı, Zəngilan və Ağdərə rayonlarının ərazilərində döyüşlərdə iştirak etmişdir.
Füzuli rayonunda döyüş əməliyyatlarının birində düşmən mühasirəsində qalan döyüşçü yoldaşlarının cəsədlərini götürmək üçün həyatını riskə atmışdır.
Döyüşdə cəsurluğu, qorxmazlığı və igidliyi ilə hamının məhəbbətini qazanan Valeh Müslümov 1992-ci ilin aprelin 8-dən 9-na keçən gecə Ağdərə rayonunun Marquşavan kəndi uğrunda gedən döyüşdə əsl qəhrəmanlıq nümunəsi göstərmişdir.
Düşmənlə qeyri-bərabər döyüşdə yaralanan 11 döyüşçü yoldaşını xilas edərək təhlükəsiz zonaya aparmışdır. O, axırıncı yoldaşını xilas edərkən aldığı ağır yaradan şəhidlik zirvəsinə ucalmışdır.
Valeh Müslümov 1992-ci il aprelin 10-da uğrunda canını belə əsirgəmədiyi Vətən torpağına tapşırılmışdır.
V. Müslümovun igidliyi dövlətimiz tərəfindən yüksək qiymətləndirilmişdir. Azərbaycan Respublikası Prezidentinin 1992-ci il 6 iyun tarixli Fərmanı ilə ilk dəfə “Azərbaycan Milli Qəhrəmanı” adını almış 11 nəfərdən biri də məhz Valeh Müslümov olmuşdur.
Bildirilmişdir ki, qəhrəmanın adının əbədiləşdirilməsi məqsədilə Lerik şəhərinin küçələrindən birinə və təhsil aldığı orta məktəbə onun adı verilmiş, büstü ucaldılmışdır.
Şəhidlik zirvəsinə ucalmasının 20-ci ildönümü ilə əlaqədar rayon icra hakimiyyətinin dəstəyi ilə Valeh Müslümovun adını daşıyan məktəbdə qəhrəmanın xatirə muzeyi yaradılmışdır.
Tədbirdə rayon prokuroru Salman Səmədov, Lerik Rayon Səfərbərlik və Hərbi Xidmətə Çağırış Şöbəsinin rəisi, kapitan Elməddin Cəfərov, YAP Lerik rayon təşkilatının sədri Elxan Qənbərov, ağsaqqal Ağaxan Babayev, jurnalist Hüsaməddin Abbasov çıxış edərək, Milli Qəhrəmanın keçdiyi döyüş yolundan danışmış, Valeh Müslümovun həyatının bütün gənclər üçün nümunə olduğunu diqqətə çatdırmışlar.
Milli Qəhrəmanın atası Əlizahid Müslümov göstərilən qayğı və diqqətə görə Azərbaycan Prezidentinə minnətdarlığını bildirmişdir.
Lerik Rayon İcra Hakimiyyəti başçısının birinci müavini Cəlil Baxşıyev çıxışında qeyd etmişdir ki, Azərbaycanın ilk Milli qəhrəmanlarından olan Valeh Müslümov bütün Azərbaycan xalqının oğludur.
Sonra Milli Qəhrəmanın adını daşıyan Lerik şəhər 2 nömrəli orta məktəbdə xatirə muzeyinin açılışı olmuşdur.
Tədbir iştirakçıları muzeydə Milli Qəhrəmanın həyat və döyüş yolunu əks etdirən eksponatlarla tanış olmuşlar.
Mərasim başa çatdıqdan sonra Valeh Müslümovun yaxınları və bir qrup tədbir iştirakçısı qəhrəmanın məzarını ziyarət edərək önünə tər qərənfillər düzmüşlər. Burada onun ruhuna dualar oxunmuşdur.
Bölmənin digər xəbərləri
