Mars Sariyev: Azərbaycan Xəzər regionunda və Cənubi Qafqazda əlaqələndirici halqadır
Bakı, 4 sentyabr, AZƏRTAC
“ŞƏT plyus” formatı ŞƏT-ə öz formal tərkibindən kənara çıxmağa və təşkilata üzv olmayan dövlətlərlə dialoq qurmağa imkan verdiyi üçün prinsipial əhəmiyyət kəsb edir. Buna görə də Azərbaycanın Bişkekdə keçirilən “ŞƏT plyus” formatlı görüşdə iştirakı sadəcə protokol xarakterli iştirak deyil, Bakı üçün Avrasiyanın aparıcı dövlətləri ilə beynəlxalq təhlükəsizlik, beynəlxalq hüquq, ticarət, nəqliyyat və davamlı inkişaf məsələlərini birbaşa müzakirə etmək imkanıdır.
Bunu ŞƏT-in bir neçə gün əvvəl keçirilmiş sammitinin nəticələrini AZƏRTAC-a şərh edən qırğızıstanlı politoloq Mars Sariyev deyib.
“Qırğızıstan və Mərkəzi Asiya üçün burada geoiqtisadi aspekt xüsusilə əhəmiyyətlidir. Azərbaycan Xəzər regionunda və Cənubi Qafqazda əlaqələndirici halqadır. Bu baxımdan “ŞƏT plyus” Mərkəzi Asiya–Xəzər–Azərbaycan–Avropa nəqliyyat bağlantısının inkişaf etdirilməsi üçün əlavə siyasi platforma yaradır”, - deyə Mars Sariyev vurğulayıb.
Qırğızıstanlı politoloq Bakının “ŞƏT plyus” formatında iştirakını Mərkəzi Asiya və Azərbaycanın maraqlarının obyektiv şəkildə kəsişdiyi daha geniş Avrasiya əməkdaşlıq məkanının formalaşdırılması istiqamətində addım kimi qiymətləndirir: “Bişkek üçün bu, xarici iqtisadi əlaqələri şaxələndirmək və regionun diplomatik mərkəzlərindən biri kimi rolunu möhkəmləndirmək üçün əlavə imkanlar deməkdir”.
Müəllif – Leyla Muradzadə
Bölmənin digər xəbərləri
