DÜNYA
Liviyada ilk dəfə olaraq qadın xarici işlər naziri təyin edilib
Qahirə, 12 mart, AZƏRTAC
Liviyada ilk dəfə olaraq qadın xarici işlər naziri təyin olunub. Bu vəzifə Nəcla əl-Mancuş adlı qadına həvalə edilib.
AZƏRTAC xəbər verir ki, gələn həftədən fəaliyyətə başlayacaq milli birlik hökumətinin tərkibində zərif cinsin iki nümayəndəsi var. Hüquqşünas Həlimə Əbdülrəhman ölkənin ədliyyə naziri təyin edilib.
Hər iki qadın nazir 2011-ci ildə Qəddafi rejiminin devrilməsindən sonra ölkənin keçid hökumətində çalışıb.
Nəcla əl-Mancuş jurnalistlərə müsahibəsində Liviyada qadınların mühüm postlara təyin edilməsini ilk addımlar kimi qiymətləndirib. O, yaxın gələcəkdə ölkənin Baş nazirinin də zərif cinsin nümayəndəsi olacağına ümid etdiyini bildirib.
Baş nazir Əbdülhəmid Dbeybehin rəhbərlik etdiyi milli birlik hökumətinin üzvləri Liviya parlamenti tərəfindən təsdiqlənib və bazar ertəsi onların andiçmə mərasimi keçiriləcək. Hazırda hökumətin müxtəlif strukturlarında çalışanların 15 faizi qadınlardır. Bu, Liviya üçün mühüm irəliləyiş hesab olunur.
Oqtay Bayramov
AZƏRTAC-ın xüsusi müxbiri
Qahirə