Londonda metro sürücülərinin növbəti tətili nəqliyyatda ciddi problemlərə səbəb olub
London, 4 iyun, AZƏRTAC
Londonun metro şəbəkəsində çalışan sürücülərin növbəti tətili paytaxtda nəqliyyatın işinə ciddi təsir göstərib.
AZƏRTAC “The Independent”ə istinadla xəbər verir ki, tətil Dəmir Yolu, Dəniz və Nəqliyyat İşçiləri Həmkarlar İttifaqının (RMT) üzvləri tərəfindən təşkil edilib.
Aksiya iş qrafiki ilə bağlı uzun müddətdir davam edən mübahisə fonunda keçirilir. Həftə ərzində ikinci dəfə keçirilən 24 saatlıq tətil səbəbindən bir sıra metro xətlərində gecikmələr və xidmət məhdudiyyətləri müşahidə olunur.
London meri Sadiq Xan tətil başlamazdan əvvəl tərəfləri danışıqlara qayıtmağa çağıraraq aksiyanın ləğv edilməsini istəyib. O bildirib ki, tətil həm işçilərə, həm də şəhər iqtisadiyyatına mənfi təsir göstərir.
RMT həmkarlar ittifaqı bildirir ki, mübahisənin əsas səbəblərindən biri yeni dördgünlük iş həftəsi modelidir. İttifaq üzvlərinin əksəriyyəti bu dəyişikliklərə qarşı çıxır. Sürücüləri təmsil edən digər həmkarlar ittifaqı ASLEF isə yeni iş rejimini qəbul edib. Yeni sistem həftəlik iş saatlarını beş gün əvəzinə dörd gün ərzində tamamlamasını nəzərdə tutur. Həmkarlar ittifaqı hesab edir ki, bu dəyişiklik daha uzun növbələrə və iş şəraitinin pisləşməsinə səbəb ola bilər.
Bölmənin digər xəbərləri
